講開眼，醫學界出名嘅鑽石王老五中大眼科系主任林順潮教授（圖）就幸福到飛起，佢噚日都忍唔住喺港台節目「開心日報」中自爆，將會喺三月二十六日結婚，未來老婆重係國際華裔小姐佳麗，當年林醫生重係評判嚟嘅。而佢未來太太後來落選後就冇做娛圈，同埋讀碩士後就去咗內地發展。
講起認識過程，林醫生甜絲絲咁講，佢哋喺「健康快車」嘅活動中認識，當時一齊去西藏幫助失明人士，點知太太就有高山症反應，林醫生就乘機獻殷勤，成功奪得芳心！佢話今年新年先求婚成功，未來會享受特首嘅呼籲，生三個仔女喎！
近排因「倒羅」潮同教統局局長阿瑟王傾到㷫烚烚嘅教協會長張文光，噚日八方見到佢左眼通紅，爆晒微絲血管咁。張文就話由於忙住今日同李國章局長傾教師壓力嘅問題，搞到捱咗幾晚夜，肝火上升，連眼球血管都爆埋，真慘。
爆料熱線：29290000、27860099
報料傳真：26239278
報料電郵：[email protected]