新股精熙（2788）上周五首日掛牌大發神威，昨日繼續炒上，股價最高見過4.35元，收市報4.15元，再升15.28％。
以精熙招股價2.20元計，預測PE已達12倍，現價較招股價炒高88％，唔通投資者對精熙前景真係睇得咁好？
究竟係隻股炒過火，抑或佢真係咁正？如果隻股真係正成咁，點解招股之時，又唔以上限定價？連串問題，搞到小初好似「問題」青年。
另一隻升得好矚目嘅股仔，就係話轉型搞太陽能的御泰國際（155），昨日突然開車，急彈12.45％，收0.285元，成交股數8592萬股，金額2376萬元。經紀陳話，雖然隻股累積升幅唔細，但有炒家話佢只係剛剛起步。
由於石油價格升咗咁多，按傳統智慧，呢類石油以外的再生能源概念股，無論喺外國或者本地都應該有得炒，而今次炒作御泰嘅班底，據講同以往炒文化傳信（343）嗰班差唔多。
慕容小初