社聯發起嘅「商界展關懷」活動，噚日喺會展頒獎，請咗曾特首做主禮嘉賓，又搵到滙豐鄭海泉、新地郭炳聯、地鐵周松崗等上台做騷，分享吓商界大人物點樣平衡工作同家庭。
難得有機會聽到咁多商界精英喺台上輕輕鬆鬆發言，更表現到大家嘅口才。當中，以新地郭炳聯（圖右）講得最風趣，佢話自己同爸爸郭得勝一樣，都好重視家庭，而男人喺外面辛苦工作，做老婆嘅就應該關懷對方多啲。一講完呢句，在場好多男士都即時拍掌支持！
之後講到地產商成日被人話同政府官商勾結，郭三少會唔會有壓力呢？佢就笑笑口答，一個人最緊要有健康、家庭、朋友及財富，咁如果四樣都有齊咯，咪睇開啲，唔好咁介懷囉！
李潤芳攝