吳卓羲和楊怡趁情人節到公園玩餐飽，他們邊玩搖搖板和𠱁𠱁轉，邊各自回味初戀情景。兩位緋聞男女，在鏡頭前後均表現親暱，戀情真假難分。
今天是情人節，楊怡和吳卓羲日前到公園回味讀書時的拍拖情景，看見穿着校服的小情侶，吳卓羲不禁憶起甜蜜初戀，他說：「我讀書時拍拖會去九龍公園，因為行公園可以慳錢。」楊怡則喜歡約三五知己到公園角落談心，她說：「我讀中學時冇拍拖，但會同同學喺公園傾心事，講吓暗戀緊邊個男仔咁。」
手拖手逛街
吳卓羲和楊怡曾傳緋聞，雖然他們無論鏡頭內外亦不時攬頭攬頸，卻強調彼此沒機會發展，吳卓羲說：「如果我真係有女友，我會講出嚟，呢代藝人唔同上一代咁保守，fans接受程度高咗。」楊怡亦說：「我當吳卓羲係女仔，佢當我係男仔，大家太清楚對方嘅性格。不過我哋就算喺銅鑼灣行街，都會拖住手行，就算唔拖手，報道都可以好誇張，所以我哋唔會理。」
送花到公司
二人還大談情人節時取悅愛侶的心得，吳卓羲說：「情人節送花係貴啲，但都要做，如果想慳錢，亦可以喺屋企煮飯仔，一樣咁開心。」楊怡則說：「送花係好，女仔一定開心，但最好直接送到女仔嘅公司或屋企，如果行街食飯，揸住紮花都幾核突。」
採訪：張俊銘 攝影：何國豪
服裝提供：MissSixty（楊怡）
髮型設計：hairConcept@W1-taylorWan（楊怡）
