香港哋女多男少，要搵一個好男仔相伴，其實真係幾難，事業型女性就更甚喇，今日推介一間新餐廳主打Fusion中式麵食，保證少油又健康啱晒OL，就算一個女仔過情人節一樣可以煙煙韌韌啦！
記者：羅灝汶 攝影：周旭文
Model：YamibySalvador
自創配料 麵汁分家
麵絕對係中國人引以為傲嘅產品，比起西方國家，中式麵食就有大量不同款式，無論形狀以至製麵素材等等，都各有特別之處，位於尖東新開業的「麵Nooodle」，就係睇準中式麵嘅特點，再借題發揮製作出獨一無二嘅中西合璧麵食。店內主要有五大麵種，分別是幼拉麵、粗拉麵、菠菜麵、甘笋麵及芝麻麵，所有麵食都可以任意配搭汁料，實行任由客人自己玩Fusion，餐館有製麵工場Backup，保證所有麵食都採用新鮮材料，另外餐廳有兩位師傅分別主理麵食及汁料，麵、汁分家自然更有睇頭啦！
少油麵食 爽滑唔膩
餐館走簡約路線，無論裝修、燈光同餐具都令人感覺舒適，負責人希望可以吸引多些女士們光顧，每款菜式都以健康為上，麵食比較少油，食落口唔會太油膩，而且全部麵類都加入鴨蛋打成，相比起普通雞蛋麵更加爽滑，就算成碟食晒都唔係問題。另外，咖啡都係「麵Nooodle」主打飲品，咖啡豆特別由瑞士新鮮空運到港，絕對有大餐廳水準！
1.粗拉麵比較彈牙爽滑，適合配上味道較濃嘅汁料。
2.菠菜麵用新鮮菠菜即製而成，每條麵條都可以清楚睇到有菠菜茸，啱晒愛健康嘅女士。
3.幼拉麵一樣彈牙爽滑，不過較適合配搭白汁或咖喱類汁料。
4.甘笋麵用新鮮甘笋即打而成，每啖麵食都有甘笋清香。
5.芝麻麵可以清楚見到每條麵條都有粒粒黑芝麻在內，所以香味特別強。
日式青芥醬海鮮$38
賣相有點似「鬼口水」的日式青芥醬，味道其實非常好，汁料經過師傅多重調校先可以出街，因為青芥醬比較辛辣，味道掌握要恰到好處，否則味道太辣會影響口感，海鮮方面有蝦、龍脷柳、魷魚、青口做代表，好足料㗎！
法國黑松露汁配牛柳絲$42
黑松露有幾貴就係人都知，店內採用400多元一瓶的黑松露醬做醬汁，真係不惜工本，加上價錢只是42元，認真抵食，雖然味道不及鵝肝汁濃郁，不過就有另一番風味。
意大利即磨泡沬咖啡$20
全店採用有機咖啡豆，不含人造色素同香味，直接由瑞士入口，咖啡香氣四溢，一朝早歎番一杯，的確一樂也。
法國香檳忌廉龍脷柳$38
大廚用咗法國香檳酒做汁料，所以白汁方面帶點酒香而且微甜，龍脷柳新鮮即叫即煎，配上芝麻麵更香！
泰式海鮮咖喱$35
一個字，甜！泰式咖喱係一種甜味同椰香好重嘅咖喱，配上蝦、龍脷柳、魷魚、青口等海鮮即煮，鮮味突出。
（上）法式海鮮串標$28
法式牛柳粒串標$25
串標大多是大酒店或者餐館才有的串燒整法，「麵Nooodle」這兩道串標絕對出得大場面，海鮮有大蝦、魚柳等等，而牛柳粒就香味濃郁。
食客有say
裝修麵麵觀
麵Nooodle
地址：尖沙嘴東部加連威老道92號幸福中心低層6號舖
電話：23682020
營業時間：8:00am-11:00pm
座位：約30人
