信安保險噚日搞咗個飯局，高層齊出動。成日四圍飛、一頭白髮當商標嘅信安亞洲區話事人歐陽伯權都有出席，相當難得。華華一見到佢，就問佢會唔會再次粉墨登場，好似上次咁拍番輯廣告，幫公司產品及形象做吓宣傳，歐陽總裁笑笑口話，如果劇情需要嘅話，都唔介意做多次！
歐陽伯權每年有成四十一個星期唔喺香港，好似早幾日先至去完北京，跟住又要去上海，再飛吉隆坡，之後重要捱十幾個鐘頭去墨西哥，事關要同總公司嘅高級行政人員開大會，果真係忙到飛起。
由於成日唔喺香港，佢話住酒店多過返屋企，歐陽總裁曾經試過一覺瞓醒，諗嚟諗去都唔記得自己喺邊，真係咪話唔驚！為怕自己突然失憶，佢每次去到酒店，都會第一時間將個房號寫落張紙度，然後放好喺衫袋，以免連房都唔識返，咁就瘀死啦！
佢成日係咁飛，出入大小機場重多過我哋去銀行，最啱講吓各大城市機場。歐陽伯權話始終最鍾意啟德機場，事關勝在夠方便，地方細細，去閘口都快啲啦；唔似家吓新機場咁，又遠又大，行到腳仔都軟囉！
李華華