劉綽琪同李純恩主持無綫嘅節目《澳門新概念》，噚日喺尖沙嘴舉行記者會，請咗樂隊Soler、港姐陸詩韻、林莉、黎芷珊及Joejunior出席。無綫安排幾位嘉賓分成兩組，比賽煮糖水喳咋，點知途中用嚟煲糖水嘅玻璃煲突然爆炸，玻璃碎片四散，好彩陸詩韻同黎芷珊閃得快，先至保住靚樣咋！
當時陸詩韻、李純恩、黎芷珊同Soler嘅大哥Julio一組，個煲煮咗幾分鐘之後，陸詩韻準備冚煲蓋時，玻璃煲突然爆開，現場成班女星就嚇到大叫，紛紛退後，好彩重有個臨危不亂嘅Julio，佢第一時間飛撲上前熄咗個火，平息咗呢場風波。
飛身熄火
事後就梗係個個都懶醒啦，Julio就話爆煲係因為用錯煲，佢重話：「枱度有個鐵煲，應該係用嚟煮糖水，但就用咗個玻璃煲，通常我遇到呢類情況都會好清醒。」而陸詩韻就死撐話：「我覺得爆煲係好事，滿到爆好似個節目咁，不過都好彩玻璃碎片冇彈中我。」
採訪、攝影：魯萍