美聯集團前副主席張錦成，舊年離開打滾咗十八個年頭嘅美聯物業後，關於佢嘅去向，市場一直流言四起，有傳佢靜靜起革命，四出在行內挖角，為準備再次出山鋪路。
傳聞多多，但張錦成要另起爐灶，做番老本行開代理行，就要「過冷河」，起碼要過咗所謂嘅冷凍期至得。張錦成曾經講過，佢向美聯主席黃建業許下承諾，半年內唔可以過檔「對手」，保證唔會與美聯對着幹。
點知，噚日美聯執行董事陳坤興急急澄清話，張錦成嘅冷凍期，其實係一年先至真，唔係之前外界講嘅半年。張錦成如果想重操故業，就要等解凍等多一大輪。
昔日大將嘅去向同行動，隨時影響到公司部署，事實上，近日美聯管理層，亦出現重大人事變動。前新界董事黎偉強，上個禮拜辭去職務。盛傳黎偉強過檔幫張錦成，冷凍期半年，即最快八月可以開檔。
美聯高層兵變，遇上今年新界區成兩萬幾個新盤單位供應，要打咁多新盤、搶客源，美聯急促穩住陣腳，將助理營業董事歐子軒擢升為營業董事；以前係助理營業董事嘅周志忠，就升做區域營業董事，管轄荃灣深井；高級區域經理郭寶強，就升為助理營業董事，盡快穩定軍心迎接新一年挑戰。
電郵地址：[email protected]