老董未落台嗰時，幾乎去親邊度都有人示威，歡呼聲唔多聽到。時移勢易，到煲呔上場，一樣避唔過被人柴台厄運，煲呔噚日着靚一靚去會展，喺一個活動上致辭時，十幾名天水圍頌安商場街市商戶竟然突破防線，成功入咗大禮堂，拿住個大聲公係咁叫煲呔出嚟接請願信。煲呔雖然面不改容，但都好尷尬，最後政府派咗個副官去接信。
去完會展，煲呔轉過頭就去咗中環大會堂，出席福建社團嘅新春團拜。好彩呢個團體係政府友好，梗係無人示威。
安仔的士直入禮賓府
不過呢，煲呔做功課真係做得唔夠熟，竟然喺台上問旁邊民建聯主席馬力，「乜你都係福建人咩？」唔通佢唔知道，馬力○四年選立法會時病到五顏六色，都全靠福建鄉里支持，令佢同蔡素玉成功入立法會？睇嚟煲呔真係要同啲愛國愛港人士加深認識至得囉。
除咗煲呔，楊文昌噚日都特別受歡迎，呢位經常同傳媒講笑嘅外交部駐港特派員，下星期一就同香港saygoodbye，好多人趁住最後機會同佢合照留念，重祝佢退休後生活愉快，楊特派員就話自己都好唔捨得香港，𠵱家香港經濟搞番掂，走都冇咁掛心。
八方喺酒會都見到啱啱喺外國探完媽媽返港嘅新聞處處長蔡瑩璧，原來佢都係福建人，怪唔得咁忙都要捧吓場，同班鄉里拜個晚年。
唔單止蔡小姐，噚日好多人都係新年後首日返政府開工，包括何安達同陳克勤。呢兩個政府新丁，噚日搭住的士入禮賓府，都幾搞笑。
佳叔為反共良講好話
Andy何話第一日返工感覺良好，成日都無出過去，又話政府遲吓會有車提供，以後唔使坐的士。克勤仔就唔同，噚日即刻跟住煲呔去酒會，一於傍到實。
至於加入咗中央政策組四日嘅劉細良，噚日就着得好鬼causal。外界有咁多支箭對住反共良，佳叔都不禁要同佢講句好說話，叫大家唔好再糾纏於佢係咪反共，重話自己都有份拉細良入嚟，唔係煲呔一個人話事㗎。對於有記者質疑反共良只不過係一個評論員，唔多夠班，佳叔就笑話自己以前都係評論員出身，又係真喎。
爆料熱線：29290000、27860099
報料傳真：26239278
報料電郵：[email protected]