外滙Ｃ中咗三T，兩蚊一注，收十萬銀多啲，雖然以三T嚟講，獎金比較少，不過二月五日之三T，熱門多數入圍，派彩少，每十元一注派五十零萬，一啲都唔奇。外滙Ｃ中咗，又悔恨三T三關之中每關加多兩隻腳，乘埋乘埋共七百五十注，為咗慳本，只買兩蚊一注，佢話：「如果有信心一啲，根本我每場一膽三腳已經掂晒。」事後梗係咁話啦，事前邊有咁本事。贏馬好講運氣，你估識刨馬，識血統就會贏梗咩。
上星期三夜馬王晶隻「真心老友」贏咗，王晶遲到，坐的士急去馬場，途中聽收音機已知「真心老友」險勝「願望泉」，的士司機都戥佢心急，驚佢趕唔切拉頭馬也。好彩及時趕到，雖然身水身汗，仍然可與太太及時拉頭馬影張威水相片。
王晶贏馬，全憑夠運，聽講冼毅力輸咗隻「願望泉」，對住巫斯義猛講法文，面色唔多好。呢場馬巫斯義騎「福勇」，前段苦纏「願望泉」，令佢放頭放得唔順，之後隻「開心宇宙」因拋咗騎師杜鵬志落地，空馬在前領跑，步速時快時慢，令冼毅力騎住「願望泉」冇法子全力加速，於是最後一步俾「真心老友」從後趕上。時間好慢，慢到一分四十二秒二，故此冼毅力賽後好鬼激氣。
跑馬就是這樣的，王晶大概狗年行大運，可以「符碌」贏馬，有人激氣，佢都懶得理咯。故此師傅教落話，賭馬唔好咁大注，只可小注怡情；買三T，兩蚊一注，襟玩好多。
外滙Ｃ贏完三T，認為自己好運，上星期三見到黃金大跌，於是沽空，每安士賺咗十七美元。平倉之後，諗下黃金價或者調整未完，於是再沽空，點知星期四晚美國金價急速反彈，要擒擒青止蝕，冇咗十美元一安士，已經算夠運。外滙Ｃ自認係行家，認為金價去到每安士五百五十美元以上後，波幅開始擴大，散戶不宜炒賣黃金，去馬場落細細注，更加好玩。