利世民唔知道一個大話要講幾多次先至會成為真話，不過有一個又愚蠢又令人反胃嘅大話，就畀人重複成千上萬次，到咗今日，就算聰明到好似醫生咁有智慧咁高尚嘅人，都會開口埋口話︰「政府要立例規管純以牟利方式經營嘅醫療集團。」
好！就算非牟利方式運作好偉大神聖，神聖又不沾銅臭的醫生啊，唔該你哋喺保護醫藥界崇高至尊嘅地位時，非必要就唔好再開口埋口話牟利好邪惡。純以牟利方式經營嘅行業有好多好多，如果照你哋嘅講法，香港不如落實共產主義好過，咁就所有人都不牟利，好唔好？你哋講到賺錢好邪惡，話唔定有人會建議立法禁止醫生收費以保存呢個行業嘅神聖高尚。
冇錯，有好多醫生係好高尚，會為天下蒼生犧牲。利世民得罪講句，就算99.9999%嘅人讀醫只係一心為咗濟世為懷，仍然有好少好少數人係為咗追求穩定嘅高收入而讀醫。唔知道究竟有幾多人讀醫係為咗錢，呢一點我留畀廣大嘅讀者自行判斷。不過，請撫心自問，如果醫生唔再係高收入嘅職業，重會唔會有咁多人去行醫？
立法愛好者跟醫生格格不入
如果你係醫生又唔屬於嗰絕少數，利世民先向你致敬。你哋話醫療集團購入未經註冊藥物，但係要醫生揹鑊，係唔公道嘅做法，所以要立法規管，而方法係要醫生去監管。再講，𠵱家醫療集團都已經有神聖高尚嘅醫生，以專業權威超近距離監督，都尚且出現醫療集團賣水貨藥，立法規管又有幾有效呢？其他醫務所久唔久都出現有醫生開錯藥，甚至乎亂開藥嘅事件，咁又點監察好呢？不如交畀一個由社會各界組成嘅委員會去管好唔好？如果你哋拒絕行外監管你哋，但係又要求監管醫療集團，市民實在好難接受。
𠵱家互聯網新興嘅一個字Blog，係由Web-log合成。咁Lobbyist呢個字，就應該由Legislation-hobbyist合成，中文可以譯做「立法愛好者」。簡單啲講，即係嗰啲「為咗立法而立法嘅人」。喺美國，Lobbyist通常解做「為既得利益者說話跑腿的說客」。人人都話Lobbyist又邪惡又腐敗，利世民真係幻想唔到醫生同Lobbyist拉上關係。
不過，的確又有啲醫生走入立法會要求立法、立法、立法，係十足十嘅「立法愛好者」。利世民始終認為，無論一個功能組別有幾多選民，本質始終如一，希望神聖嘅醫生嘅專業唔會因此而蒙污。
利世民