近兩個月，見到雀屍重驚過見到喪屍，聽到H5N1更加唔驚唔得。香港人一向快人一步，更愛杞人憂天，前個月已經有新聞話雀仔街變得冷冷清清，無乜人想接觸飛禽，唔想再聽雀仔唱歌。但雀仔識飛，無處不在，朝朝起身都見到窗邊有雀屎，嚇得我要帶兩對手套加一個口罩，再離三個身位用水喉勁射大清洗。點算？使千幾蚊就得。最近有水貨舖擒住呢個禽流感潮流，返咗兩部驅鳥機，筆者今日就「冒死」去九龍公園搵白鴿群測試，一開機，果然雞飛雀走！
記者：馬慶武
攝影：周旭民
Model：Cat、Yannie（Salvador）
1號機──閃燈、警報、超聲波三合一
正常嚟講，香港空地唔多，住高樓大廈應該唔使太驚有雀仔飛近。住村屋、平房嘅就可能擔心啲。但始終預防勝於治療，千幾蚊買個安心尚可接受。呢部驅鳥器以超聲波驅鳥，發出超聲波由3,000Hz-25,000Hz自動交替，針對不同鳥類，人類只會聽到少許聲音，但雀仔就會聽到如飛機喺頭頂經過嘅巨響。唔想長響，可以開着機身前面的感應器，只要有鳥類喺10米範圍內飛過才會發聲。另外還可開啟閃燈及警報聲，唔只雀驚，賊都應該會驚。而且最方便係可以用乾電池，去露營BBQ都繼續驚雀仔飛近的話，可以帶埋去。不過既然咁驚的話，都係留喺屋企鎖好門窗算喇。
試機報告
效用：★★★★★（5粒★為滿分）
近幾年香港出現幾個「鴿子園」，例如尖沙嘴碼頭，又例如九龍公園，嗰啲白鴿群出嚟搵慣食，隻隻肥肥白白，已經唔太驚人，我哋一於派出兩位Model女殺手，攞住部機慢慢步近，白鴿群依然氣定神閒，未有太大反應。開機先開閃燈掣，可能係日間關係，反應唔大，但一開警報聲，可能聲量調校得太大，唔只白鴿群退後兩步，旁邊野餐緊嘅菲律賓小姐同晨運阿伯都嚇一嚇望過嚟，睇嚟嚇賊仔效用大啲！壓軸上場係啟動超聲波，開啟後大約5秒，白鴿群即全部起飛，我覺得真係Work噃！
2號機──扮麻鷹嚇雀仔
2號機外形較的骰，沒有閃燈及驚報，而且並唔係用人類聽唔到的超聲波。而係透過發出鷹及貓頭鷹捕食時嘅叫聲嚇退野鳥。原理較簡單自然，可調校大細聲，雖然係人類可聽見聲音，可幸叫聲唔算太嘈吵，而聽得到嘅聲音反而更令人放心。同樣設有感應器，而且感應角度比1號機嘅90度更闊，足有130度！說明書稱叫聲驅鳥有效範圍遠達9米，講多無謂，即刻來試試！
試機報告
效用：★★★☆☆
無咁多功能試，一開波即開聲先！開頭細細聲白鴿無乜反應，將音量調大約t，白鴿們就有反應，不過反應不算太，只係跳走，並無起飛，可能「港燦肥鴿」們無乜遇過日本大鷹及貓頭鷹。話時話，呢啲鷹叫聲及貓頭鷹叫聲，會唔會嚇走細雀，但引嚟大麻鷹呢？
售賣點：JCShop（31022783）
銅鑼灣時代廣場8樓833號舖
台灣機場飛機模型嚇雀
其實喺日本、台灣呢類平房較多的國家，驅鳥器已經好普及。而機場更為免雀鳥影響飛機升降，一般都會用驅鳥器，但中國大陸及台灣就更特別，好似北京首都機場就竟然季節性地請專人用大鑼大鼓趕鳥，遊客見到此奇景，一定要埋去影張合照啦！而台灣空軍機場就更加用遙控模型飛機驅鳥，咦？咁咪要長期請專人喺度玩模型飛機？
聽力學家：超聲波多聽有害
據訊噪比聽力中心的專家鄭美君表示，人類耳朵只可以聽到20-20,000Hz的聲音，如驅雀機發出的聲音高出此數（超聲波），人類耳朵就聽不到此聲音，但並不表示聲音沒有進入你耳朵。她表示以上只是理論，沒有試驗下難以提供安全的實際距離，可使用的時間。簡單啲講：嚇雀就算喇，咪以為聽唔到就攞朋友隻耳仔嚟玩啦！
玩雀雙姝點防禽流感？
