日股散380點，港股只係唔見113點，算係頂得吓，唔使太悲觀，再落多些少，要買C輪。
恒指成份股兜亂，網通（906）上，駿威（203）落，好多人都估中，股價裂口開出，啲相關C輪亦係，做即市冇食搵，反而輸錢。例如早段如果唔好彩高價1.17元（開市5分鐘）買入網通C輪9186，埋單0.99元計數，即刻唔見15%，而隔夜揸貨嘅則仍賺46%。朝早高價搶另外隻9515，又係難兄難弟。
交行C輪9289：建行（939）焦點所在，升5.3%，隻隻C輪紮紮跳。價高莫追，唔回吐唔上車。反為可以留意交行（3328）嘅C輪。
建行與交行，你追我趕。交行C輪正路之選係9289，4月中夠鐘，輪價69仙，負溢價1.1%，槓桿率6.4倍。想買賣易啲，向2273埋手。隻輪7月中到期，輪價52仙，溢價6.2%，槓桿率8.5倍（有效5.7倍），引伸波幅31.8%。
中財險C輪9513：平保（2318）升1.7%，國壽（2628）升1.2%，中財險（2328）企定定，平水2.575元。吼位買中財險C輪，博平保同國壽帶住中財險上去，對象係9513，3月初夠鐘，輪價54仙，負溢價1.4%，槓桿率4.8倍。
章盛