早幾日利民世幫某政黨做嘉賓，論壇題目係「政府應否減稅」。有睇開呢個專欄嘅朋友都好清楚，政府不但應該減稅，而且應該落實納稅人約章，保障社會每一分一毫嘅資源。
其實納稅人約章嘅精神好簡單，就係要政府「使幾多攞幾多」，有盈餘本來係好事，不過將資源閒置喺庫房其實非常浪費，不如藏富於民，畀市民自己好好處理財富。事實上，政府有盈餘即係代表啲錢已經使唔晒，如果政府再夾硬去使錢，十居其八九都係將啲錢使落啲非必要嘅地方，好自然會浪費。納稅人將血汗錢交託畀政府，唔代表佢哋完全放棄話事權，政府浪費資源係非常嚴重嘅罪孽。
老實講，香港政黨一向畀人感覺「原則欠奉，立場不定」。不過今次論壇，利世民見到政黨嘅經濟事務發言人的確有好大進步，明顯係終於明白經濟問題嘅重要性，亦可以好理性咁討論問題，相信假以時日政府高官都唔敢睇小政黨，會認真對待政黨嘅建議。立法會三大政黨或多或少都支持減稅，雖然唔一定出於尊重納稅人嘅勞力成果，不過立場正確仍然抵讚。
使錢，使乜你教！
呢個論壇，最令利世民無名火起三千丈嘅人，係幾個自稱專家嘅自大狂。佢哋話政府唔應該減稅，因為市民會唔識好好把握自己嘅錢，又話︰「就算係自己嘅錢，有啲人都會蠢到攞去澳門進貢。所以啲錢應該交畀政府做有益社會嘅嘢，減稅對社會無益。」
利世民唔知呢位專家有無將佢全副身家交晒畀特區庫房。如果佢無咁做，佢係一個正常人，不過好虛偽。如果佢真係將所有財產都奉獻畀政府，咁佢就係一個言行一致嘅人，我利世民向佢致無限祝福。
大家撫心自問，如果有得揀，你會寧願有權去決定點使自己嘅錢，定係畀一班你完全唔認識嘅政客同官僚幫你使錢？其實答案好明顯，不過梗係有的人認為你唔夠佢哋聰明，要教你點使錢，你話世民火滾係唔係好合理先？
利世民