南韓啲電影明星、導演上街靜坐，抗議電影貿易自由法，南韓容許更多美國電影入口，話會扼殺南韓電影業嘅生計。
南韓政府真奇，為咗要同美國談判電影入口，突然下令削減本國電影嘅上映日期。其實邊啲戲好睇，電影票房自會有指示，政府理嚟做乜？如果與美國談判有成（其實一定掂，因為美國與南韓會簽訂雙邊自由貿易協議），美國電影入口，一年放映幾多日，使唔使政府來定呀？香港從不限制美國電影入口，過往本地片鼎盛之時，香港啲戲院放映本地片重多過荷李活片，𠵱家本地電影好唔掂，梗係要靠荷李活電影啦。
南韓農民來港參加世貿示威，所持理由係南韓農民不堪外國農產品競爭，需要保護。南韓有所謂「韓流」文化輸出，韓語電視劇橫掃中台港，有好大競爭力啫，點解南韓電影界咁驚美國電影入口放寬？其實南韓人習慣咗保護心態，倚賴政府干預扶持，用納稅人公帑津貼，即使到自己長大成人，仍然攬住老竇唔放。以此觀之，南韓啲電影界紅人，心態上仍係農民本質。
本地電影是否需要政府扶持，先至可以頂得住美國文化入侵，好有疑問，從粵語片七日鮮時代到邵氏，李翰祥、王羽到嘉禾李小龍、成龍、新浪潮電影、許氏兄弟、周潤發等當紅時期，幾時問政府攞過錢？幾時曾經限制荷李活電影入口？香港電影咪一樣威盡東南亞？香港電影之死，不在於政府唔支持，而在於一窩蜂粗製濫造，編劇完全受唔到重視，拍片亂咁嚟之故，現在香港有甚麼電影發展委員會，睇死佢無能為力，只會做政治騷。
又以台灣為例，台灣政府過去一向有背後支持電影業，咪又係唔掂！南韓電影界應該趁目前勢頭好，拍多啲好片，唔係將精力用於反對美國電影入口之上，南韓政府過往慣咗保護本國企業，現在放鬆，開門，方知道開放之難。