Tom仔前任CEO雲南一級特產王兟有幾勁，相信大家都耳熟能詳，咁頂替佢個位嘅Tommei湯美娟又點呢？雖則Tommei姐未肯接受訪問，但等華華八住啲畀大家知先，佢除咗心地幾好，亦係一個令人驕傲的香港故事。
話說Tom姐每年都會攞一筆錢，以無名氏名義捐畀弱勢社群，點捐法？就係叫佢位秘書小姐每日睇《蘋果》社會服務版，然後發辦決定捐畀邊啲苦主同埋捐幾多，呢個傳統經已維持咗好耐，只係得幾個人知。
咁香港故事呢？Tom姐係喺人傑地靈嘅華富邨長大，勤力讀書考入港大，全部靠自己，重分分鐘兼幾份補習搵錢嗰隻；畢業之後又係靠自己闖出事業，做完安達信合夥人後，快人幾步殺番入祖國，做咗平安保險嘅CFO幫手打天下，跟住引入滙豐做股東起埋朵，𠵱家又返香港……佢就係因為覺得所有嘢係香港畀自己，喺呢度長大受教育，所以要感恩回報。
其實華華同Tom姐唔熟，唔會評論佢份人係點，只係聽講佢牌品幾好，打牌重預咗輸。Tom姐話新正頭都有打吓衞生台灣牌，咁打幾大同有無斬獲？佢只係話有鋪嚦咕嚦咕叫四飛食唔出，但食咗鋪十三么103番，收二千幾銀，果真人紅當旺！華華推算，佢應該係打100蚊底20蚊番，以年薪千幾萬嚟講，果真衞生也！
李華華