唯冠（334）由去年11底0.50元起步，至上周五升上1.69元，創下52周新高。唯冠唔夠3個月升咗兩倍幾，計落認真驚人。
經紀黃話，唯冠次次炒上都有唔同消息，最新版本則涉及收購合併，真係信不信由你。
去年12月底，唯冠表示同日立嘅侵權官司講掂數，股價即時反彈。跟住喺今年年頭，有分析員同唯冠管理層見過面後，出報告話唯冠液晶體顯示屏（LCD）產量同定單強勁，刺激芬佬追住係咁買。唯冠近排炒上嘅古仔，就係同台灣嘅奇美集團合作，幫奇美生產LCD顯示器。
經紀黃話，以上嘅利好因素，基本上已逐一反映在股價上面，但唯冠股價仍然升過唔停，而最新流傳嘅古仔，就係話佢有收購合併，至係堅定流，佢就唔清楚，因為家陣班對沖基金好進取，有乜消息都會炒一餐，好多時炒咗先算。
唯冠上周五最高升上1.73元，收1.69元，升4.32％，成交股數2183萬股，金額3573萬元。
慕容小初