民建聯上年會員人數翻咗兩番，今年會繼續努力，向住「萬人」大黨進發。適逢今年開始，各式選舉開始埋身，所以主席馬力噚日喺新春團拜講到今年嘅新年願望，就「票源廣進」，好鬼現實。
馬力仲話，如果有適當人選，都唔排除派人去選特首㗎，唔通係想話畀煲呔聽，唔好以為得佢一個人先掂咁得戚？
無論喺樂壇定係政界嘅克勤，呢期都紅到不得了。今日會去禮賓府返工嘅克勤仔，噚日都有去民建聯會員大會兼新春團拜，馬力都有同呢個政壇新星打吓招呼，鼓勵吓佢，但就大肆澄清，佢唔係民建聯針嚟㗎，重叫大家唔好畀咁多壓力佢，真係好錫呢個𡃁仔喎。
三十都未出頭嘅克勤入政府前已經「洗心革面」，唔係話要改過乜嘢大錯，只係將頭髮剪得整齊啲，將個手機鈴聲由twins轉番普通鈴聲，一切都無非想畀人斯斯文文嘅感覺。
有路人甲衰衰哋咁話，曾鈺成愛將鍾港武同李慧琼墮馬，唔係因為能力低過克勤，反而係因為生得太高，煲呔有得揀，梗係唔會揀高過自己嗰啲啦。
着到利是封咁出席會員大會嘅蔣麗芸就話，預料情人節都無乜驚喜，事關佢老公都唔係一個浪漫嘅人，而且結咗婚咁多年，睇怕都無嘢好搞。唔知佢老公睇到，會唔會刻意搞搞新意思呢？
傳真︰2623-9278
電郵︰[email protected]