即將舉行復出個唱的關淑怡近日負面新聞不絕，影響形象之餘，更對門票銷情構成打擊。前晚她為此約見傳媒，罕有地就有關她飄忽、無故失蹤和拒絕宣傳等傳聞逐一澄清，揚言她早年並非失蹤，而是為照顧兒子才推掉工作。
是非不斷的關淑怡於下周四（二十三日）舉行三場「關於我關淑怡演唱會」，記者昨日向城市電腦售票網查詢其個唱售票情況，發現只有二十五日尾場的一百元門票售罄，其餘仍有大量門票發售。而前晚關淑怡罕有地在紅磡都會海逸酒店接見傳媒，並逐一回應傳聞，看來是為了谷個唱門票。
「冇出爾反爾」
關淑怡談到屢次失場和拒絕宣傳個唱的傳聞時說：「演唱會目前進行得如火如荼，成件事有小小冤枉，自己冇咁樣，話我出唱片失蹤同飄忽係冇發生過，我亦冇出爾反爾。」
問關淑怡這次復出是否感到很大壓力時，她雖未有回答，但就懇求記者不要再給她壓力，她說：「我出嚟係想畀自己一個公道，啲報道對我斷章取義，無中生有。」有指她本答應擔任李克勤和黃耀明演唱會嘉賓，但其後卻不了了之，關淑怡否認道：「黃耀明嗰邊初時係有人接觸過我，但最後傾唔成。」
「我問心無愧」
對於被指經常失蹤，關淑怡回應說：「當時我去咗加拿大，為咗BB着想，我推咗好多工作，十樣嘢九樣都係傳。基本上我只係想唱好自己嘅歌，識我嘅人都知道我工作態度係點，咁寫法對我專業造成好大影響，對我係一種誹謗，我會保留追究權利。」
問這些傳聞會否打擊信心，關淑怡說：「唔能夠用打擊嚟形容，但影響心情係有嘅。有關失場同出爾反爾都係屈我，我都係人，總之問心無愧。我亦唔係神化飄忽，之前有人影我坐喺酒店五個鐘口噏噏，咁就話我神化，我唔埋單走就有問題啫，我坐喺度聽歌，跟住啲拍子口噏噏都係好正常啫。」
問關淑怡有否後悔復出，她說：「我唔善於表達自己，所以好少去解釋，對於一啲新聞，我唔係冇反應，只係唔回應，希望大家明白我處境。我將好多時間放喺小朋友身上，所以咁多年都冇回應，私人嘢我唔會再講，包括我個仔在內。」
採訪：王崇穎 攝影：陳俊強
