銀行競爭激烈，樓宇按揭同私人貸款利潤今非昔比，唔諗吓計仔又點可以開拓新客源，呢！好似過年前，唔少銀行都推出兒童戶口；過咗年又搶青少年生意。
恒生總經理（個人理財及財富管理業務）梁永祥（圖右）噚日介紹一張叫alpha嘅提款/扣帳兩用卡，專畀15至18歲朋友仔用；佢哋雖則未有賺錢能力，但消費力絕對唔少，Keep住呢班準客仔兩三年，到佢出身就收為新客，計劃都好周詳。
講起恒生，自從精明到極嘅柯清輝主政，大有滙豐化之勢，即係講人情味已經過時，一切效應行先。上個禮拜加理財戶口收費只係小試牛刀，削減分行趕走小戶嘅行動隨時出現。有個咁識計數嘅大班，股東Happy，客戶就頭痛囉。