情人節總係忽略咗一班無拖拍嘅寡佬們，好彩香港賽馬會夠善解人意，喺跑馬地馬場搞咗一個情人節濃情之夜，搵齊6位甜品佳人陪大家一齊過節為威喂。寡佬們，一於趁賽馬日殺落馬場，邊睇馬邊睇佳人，話唔定可以財色兼收呢!?
記者：羅灝汶 攝影：楊錦文
寡佬有着落
為免寡佬馬迷觸景傷情，馬會就請來6位甜品佳人搞吓氣氛，嚟個小型賽事。話說活動由2月15日及22日嘅2個賽馬日進行，每位甜品佳人代表住一款甜品，佢哋會喺會場內向各位馬迷推介甜品兼拉票，大家就可以任意要求靚女一齊合照，22號賽馬日會現場公布結果，估中「最受歡迎甜品佳人」嗰10個馬迷重有名貴禮物收，咩嚟嘅？贊助商係SmarTone-Vodafone，你話呢？
點玩先？
2月15及22日，馬迷進入跑馬地馬場，可以得到一張遊戲卡，其中一部份是「SmarTone-Vodafone最受歡迎甜品佳人」選舉。入場人士只須填妥參加表格，於2月15日及22日第三場賽事開跑前，投入跑馬地馬場公眾席的指定投票箱即可。抽獎儀式將於2月22日在跑馬地馬場舉行，中獎名單將於第六場賽後公布。
6位佳人賽前預測
坦白講，每位佳人各有性格，真係好難揀喎！雖然第一日投票已經完結，小記都即時為大家預測一下邊位靚女可以成為最受歡迎甜品佳人，嚟緊兩個賽馬日，就到大家自己落場投投票喇！
「心」情印記$30
可以即場用糖醬寫上自己嘅深情語句，而且會送多條絲帶畀你，用嚟貫穿薑餅上兩個圓洞，然後掛上頸當頸鏈，名副其實做到「掛住你」嘅效果，購買時重會送多個透明膠盒，等你可以保存到一至兩年，留為紀念。
翻版楊怡Valerie：「好多人話我似楊怡，不過我自己就唔多覺喇。」
細「雪」紫蜜桃$30
經紅酒烹調嘅紫蜜桃，放於瑞士Movenpick呍呢拿雪糕上，香濃酒味慢慢滲入雪糕內，無論外觀同味道都絕對一流。
熱情如火嘅Winnie：「我認為自己可以帶畀馬迷情人嘅感覺，到時投我一票啦！」
花語情迷玫瑰果凍$30兩杯
熱情果味啫喱果凍，加入玫瑰花瓣，每一啖都有香濃嘅玫瑰花香，一次過可以試晒兩種味道，又熱情果又玫瑰，好浪漫啊！
表情多多嘅Candy：「呢款果凍一次過有兩杯，味道唔會太甜而且有好香玫瑰花味，如果有男仔請我食就好喇。」
戀戀深情朱古力蛋糕$30
大廚黃師傅親自監製，內藏軟滑朱古力醬，配埋非常滑溜嘅瑞士Movenpick呍呢拿雪糕，口感一流。
最好笑容嘅Zoe：「我誠意推介呢款朱古力蛋糕畀客人，因為自己試過真係好好味㗎，重有記得投我一票呀。」
「果意綿綿」朱古力甜夢泉$30兩串
將心形蜜瓜、棉花糖及草莓串於竹籤上，即場浸泡入朱古力噴泉內，變成香濃朱古力串，平時只有大酒店先會有嘅朱古力噴泉，首次出現於馬場公眾席，點都要試吓！
眼大大嘅Rachel：「我最鍾意同人影相，呢款甜品絕對可以令到你同情人甜甜蜜蜜呀。」
糖衣草莓$30兩串
串連於竹籤上的新鮮草莓，加上一層甜甜糖醬，製法簡單，主要以冰糖葫蘆為概念而成，酸酸哋嘅士多啤梨配上糖醬，的確好味喎。
鬼妹FeelJulieA：「我唔係太識中文，哈哈，如果我可以畀到大家一個情人感覺都幾好吖！」
即場反應 Winnie大熱
採訪當日正值第一個甜品佳人進駐嘅賽馬日，發現一眾寡佬們對甜品佳人都呵護有加，重掛住影相影到忘晒形！記住，如果拖埋女友入場就咪咁投入喇！
跑馬地馬場公眾席
日期：2月15日及2月22日
入場費：$10（入場人士必須年滿18歲）
開放時間：6pm-11pm 查詢電話：1817
