香港人十分善忘！唔緊要，本進士又提你。2003年3月15日，世衞提出嚴重急性呼吸系統綜合症（SARS）這個新病稱。在短短幾個月全球有8,000多人染病，奪去900多條生命。當時，香港有1,755人感染，300人不治。讀者仲記得當時心寒嘅感覺嗎？再睇埋跟住啲資料：1918年2月，西班牙流感向全球蔓延擴散，持續肆虐一年至1919年1月，十多億人感染，死咗5,000萬人。西班牙流感病毒係一種喺禽鳥身上發現並變種至可傳人嘅病毒。
我希望讀者考慮一個問題：你希望喺有親人因為疫症爆發而過世後示威要求周一嶽辭職呀？定係喺未出事前要求政府做好預防流感擴散嘅措施呢？我相信答案顯而易見。不過，衞福局嘅周一嶽局長上星期話政府會繼續考慮中央屠宰！究竟考慮到幾時呢？係咪又係要有人死先做呢？
特首嘅施政報告之前話政府「決定」重組架構，設立食物安全檢驗檢疫署，進士好耐之前講過食物安全以及檢疫嘅問題皆取決於內地是否認真做檢疫工作以及準時通報疫情，所謂整合架構只係為混淆視聽。果然，喺立法會呃咗個D8常秘位之後又話唔使重組嘞！
究竟我哋（包括市民同政府）有冇吸取過教訓呢？進士喺SARS期間亦失去過一啲好友，我真係驚H5N1㗎！所以，請周局長搞清楚priority快手搞掂個中央屠宰啦。重有就係唔好搞到個局嘅行政好似垃圾咁，你個乜Q康復組由美利搬過CitibankTower都唔夠幾個月，最近又話要搬，你當審計署死㗎？個康復專員只係一介EO，照計就唔夠班做啲咁嘅決定，睇怕多咗個常秘令肥師奶得閒得滯啦！
倔頭進士
傳真︰2623-9278
電郵︰[email protected]