陳奕迅（Eason）前晚帶病在紅館開騷，雖然他又唱又跳，但多次甩嘴及忘記歌詞。Eason表示開場前屙了八次，希望fans見諒。
陳奕迅一連九場的「EasonChanGetALife陳奕迅香港演唱會2006」前晚在紅館開鑼，日前他感冒菌入腸，入院留醫，前日早上才出院往紅館踩台，抱病在身的他仍堅持演出，但就多次甩嘴和忘記歌詞。他與德國漢堡交響樂團合作演唱歌曲《1874》時更只唱了兩句，然後交由樂團演奏。
「啲菌成身走」
Eason說：「多謝入場嘅朋友多多包涵，想做好啲，但因為緊張，做得唔好，對唔住，想集中精神唱得好啲。不過實不相瞞，我今朝先出院，啲感冒菌喺身入面。」台下有歌迷大喊：「戴口罩。」Eason聞言說：「唔係戴唔戴口罩嘅問題，戴胸罩都冇用，係個人行血之後，啲菌成身走。」之後他便唱出《忘記歌詞》，他謂希望忘記一些不如意的事。
Eason又多番感觸地表示希望每日有十五分鐘獨處，了解自己，但因為太忙而不能實行，他說：「要湊女又要拍拖，好忙。中國人好興將珍藏嘅嘢放入餅罐。」台下即有人大叫他放女兒入餅罐，Eason即笑說：「放個女入去？佢好快大，會有自己嘅生活，有毛有翼會飛，有男朋友喇，但可能得幾歲。」
Eason在演唱會上大玩黑色幽默，除開場時戴上烏鴉帽外，中段時又由一個與他一樣服飾的替身營造撞車場面，並由兩位救護人員抬走。
啪止屙丸出場
演唱會在晚上十一時十五分結束，Eason在後台接受訪問時提到病況，他謂曾考慮停唱，並說：「前日綵排都冇事，只知係腸胃差，後尾綵排完啲菌成身谷住，所以入院吊糖水同打針，個人𠵱家都未暈完，今日都屙咗七、八次，要食止屙丸出場。」Eason其後到紅館後台與在場等候的二十多名fans打招呼，雖然他說話有氣無力，但也逐一與fans握手及簽名。
採訪：胡比、娛樂突發組 攝影：仇志德
