樓高八十八層嘅荃灣如心廣場，雖然無望成為全港最高嘅大廈，但肯定有全港最高速嘅升降機。
發展商華懋集團嘅吳崇武話，如心廣場高低兩座，差唔多起好，部𨋢重好快，由地下去到頂層嘅八十九樓，只須一分鐘，快過飛上天。佢重話，最快可以喺三四月請記者試搭。
蘭西聽講，如心廣場嘅升降機，由其士電梯負責安裝，暫時係全港最高同最快嘅升降機。吳崇武話，𠵱家好多高樓大廈，好似中環國際金融中心第二期咁，要喺中途轉𨋢再上，好似如心廣場咁，一部𨋢直達八十九樓，應該係全港獨一無二。
講開如心廣場，較早時，崇光百貨傾包租全個場傾唔掂之後，華懋決定自己做番。冇咗個單一租客，華懋要諗計，加強吓商場設施。聽講，發展商最近又改圖則，為商場加扶手電梯，疏導人流，令到個場要到九月先入得伙。
吳崇武話，𠵱家已經有十幾個租客，交咗意向書，最大嗰個係百貨店，傾緊全層成十萬呎商場樓面，但暫時未有結果。
電郵地址：[email protected]