過去1周，杜指升126點或1.2%，紐約期油則跌3.36美元或5.1%。
油價跌，對美股有利，美股升對港股亦唔係壞事。不過恒指成份股兜亂，加上和黃（013）分拆意大利3G又有阻滯，短期大市氣氛恐怕麻麻。
恒指P輪9683：大市如果重企得住，或者升少少，吼位揸恒指P輪，博一啲藍籌被動式沽售盤拖低恒指，有兩隻恒指P輪可以諗吓。
恒指P輪9683喺4月杪夠鐘，輪價14仙，溢價2.5%，槓桿率27.6倍（有效15.2倍），引伸波幅16.4%。
另一隻恒指P輪9562則喺下月尾到期，輪價16.7仙，溢價1.2%，槓桿率20.5倍（有效15.2倍），引伸波幅16.2%。兩隻P輪波幅都差唔多。
網通C輪9515：網通（906）做恒指新貴，上周五已升定0.45元，日內仍會有啲買盤，股價繼續上升。買網通C輪，可能已經遲咗1步。
硬係要買，9515比較諗得過。隻輪4月尾到期，輪價1.60元，溢價4.8%，槓桿率8.1倍（有效5.7倍），引伸波幅43.1%。
駿威C輪：駿威（203）踢出恒指成份股，有沽售壓力。即使唔係呢件事，早前升得太多亦易有回吐。
咪因呢幾日駿威下跌而買駿威嘅C輪，等正股回到3元邊邊至考慮。
章盛