人哋話一入侯門深似海，八方就話，一入官場深似海就真啦。兩位同行何安達（Andy）同劉細良心口寫個勇字，前後腳加盟特區政府，做煲呔班底同樁腳，希望一展所長，唔再做塘邊鶴只識彈唔識做。咁中國人自古都係學而優則仕，八方祝佢兩個孖寶兄弟好運，唔會好似佢哋嘅師傅劉兆佳咁變成口水教授，連記者仔都唔肯去聽佢吹風。
細良唔再做塘邊鶴
安哥同良仔未上場，先受到土共圍攻。細良以前係民主黨成員，又批評過民建聯，死梗喇；至於安哥就好少少，因為佢已經好耐冇寫評論文章，而且用英文寫，所以少啲黑材料被左仔攻擊。
良仔都知大鑊，於是聽佳叔講主動封口，佢上周五開始返政府總部十三樓辦公，接受埋電台訪問，就叠埋心水做其中央政策組全職顧問，同佳叔合作，為煲呔、肥龍同唐唐出謀獻策。咁你以前月旦得人多，都預咗俾人抦番轉頭，咪平常心對付囉，反共有乜問題呢？煲呔九七前夠反，咪一樣做特首。
唔講唔知，良仔今次入政府，好多嘢都係走回頭路，九二年佢喺民主黨做研究部主管，就喺CGO（政府總部）四樓返工，𠵱家升高咗九層，行出行入都會撞到啲舊同袍；另外，佢八八年起喺中大讀社會系碩士，係佳叔嘅助教，幫佢手教《中國社會》，𠵱家兜兜轉轉，又再為佳叔服務，世界真細小。
走回頭路唔緊要，八方反而擔心細良同讀者講再會時語重心長話，「機會來臨時，自己應有勇氣去把握，不能只做塘邊鶴。」，又希望啲「唔同意佢入政府嘅朋友，日後可以為佢嘅決定喝采」，可能太天真。呢個世界永遠係喝倒采嘅人比喝采嘅人多。
至於安哥，佢今朝正式上任做新聞統籌大員，晨早去禮賓府返工熟習情況。八方問安哥有乜大抱負，佢話希望喺政策方面做好啲配合，咁佢負責對傳媒，日後一定有機會碰頭啦。
噚日係中國情人節，上班前夕，安哥同老婆噚朝早去咗船灣淡水湖漫步，佢話：「我想返工前清靜一吓頭腦！」跟住夜晚同太太去咗沙田城市廣場撐枱腳，問佢鬼佬情人節點過？佢話要睇煲呔，因為如果老細有嘢做，就邊度唔使去，否則佢太太就好想去試吓新世界嘅Spoon，話度2