這個採訪可謂小記做寵物版以來最不順利的一次，經歷絕對前所未有。話說這個關於狗癡Vickie一拖五的養狗經，訪問一早約定在星期二早上進行，誰知早上七點正小記收到Vickie來電，她嗚咽的道：「一隻大白熊昨晚跑走了！」咩話？主角不在又怎成事？小記立即嚇醒，驚足一日，好彩下午Vickie話已尋回失狗，那一刻，相信她深深體會到失而復得的感受。而小記都一樣，否則今日的寵物版真係要星期天休息了。
記者：黃藹瑩
攝影：楊錦文
惡貓嚇怕狗
Vickie是一個典型狗癡，為了家裏五隻狗狗的生活空間着想，自己與牠們一齊搬了來西灣河，以為從此過着安安靜靜快快樂樂嘅生活。點知五隻狗仔唔多生性，名副其實狗咬狗骨又分黨分派！唯一令佢哋和平共處一陣子兼製造到溫馨畫面的功臣居然係一隻流浪貓！「Mavis（唯一貓仔）好犀利，佢係全屋最惡的，班狗仔都怕咗佢！」一招無影抓，唔理大狗細狗，一個唔高興就扯你兩巴，連Vickie說時也忍不住笑。
第一幫：老友狗狗玩聯手
學阿媽話齋，手指都有長有短啦，人一定會偏心的，就連Vickie都不否認她最痛錫的是大白熊（比利牛斯山犬）細佬同金毛尋回Romeo。「細佬比較溫和同懂性，好多時班狗仔嘈的時候牠都會唔出聲，幾成熟，重好護主；當時去到寵物店還未知要哪隻狗的時候，牠就自己走過來，隔着玻璃錫錫我，我就立即買了牠。至於Romeo就好有人性，佢知我唔開心的時候就會走過來安慰我，重會不停用頭掃我對腳，好似貓嗲人那樣。」原來兩隻都咁得Vickie寵愛，難怪兩位咁夾得來，「佢哋兩個好老友，重好一條心。好似有一次Romeo同一隻雪橇犬對峙，細佬第一時間過去幫手造勢，嚇走隻雪橇，之後佢兩個在散步時一撞見雪橇犬就一齊擺出戰鬥格。」
第二派：少女黨High到走狗
都話呢幾隻小狗愛分黨分派搞小集團，這邊廂Romeo同細佬埋堆，另一邊廂就輪到大白熊Ocean同唐狗Mimi糖黐豆。可能狗同人都係一樣，異性雖然相吸，但同性始終比較易埋堆，難怪兩位「少女」特別玩得埋。小記一開頭就話其中一隻主角跑掉了，這位迷途小狗正是Ocean。「Ocean跟Mimi最Friend，那天就是牠們倆一起玩的時候，跑跑吓就不見了Ocean。佢沒有Mimi般聰明，唔識返屋企，搞到最後俾漁護署在太古城把牠找回來。」
第三黨：孤獨唐狗
