台灣才子李敖一向好欣賞莫文蔚（Karen），連佢個成層樓咁大嘅書房都掛咗張Karen嘅半裸海報，直至近日計劃賣書房先至除咗落嚟。
今次Karen喺台灣演出百老匯音樂劇《吉屋出租》（Rent），李敖因為怕凍而唔去捧場，但噚日佢都有專程探Karen班，算係補番數嘞。
互笠高帽
李敖話美女五大標準係瘦、高、白、秀氣同年輕，佢讚Karen唔單止樣樣有齊，而且重識講法文、英文同意大利文，好有才華，所以層次更高。Karen聽到當然好開心，讚番李敖學問高兼靚仔，同一般讀書人唔同，實行互笠高帽。
現場有人見佢哋猛咁打情罵俏，於是問Karen會唔會考慮同李敖交往，Karen即刻好嬌嗲咁話大家諗得太多。問到李敖喺佢心目中，Karen同老婆邊個重要啲，李敖居然話：「這個問題太難了。」真係考起才子。