電單車婚禮：電單車陪出嫁東風750最搶鏡

跟電單車會「出巡」結婚有好多第一次，例如第一次參加電單車隊婚禮、第一次見人用國產東風750做新娘車、第一次目睹十幾架小綿羊在Highway慢駛……這個別開生面的電單車婚禮，一對電單車迷新人唔坐勞斯萊斯，用電單車自組花車，四圍去影婚紗相，難怪一對新人當日全程笑到合唔埋口喇！

記者：黃婉冰　
攝影：陳智良

國產「東風」變花車

可以一次過號召二、三十架電單車齊齊出動，普通人可能會難啲，但對新郎哥CK同新娘子金仔嚟講絕對唔成問題，事關兩位新人都係電單車迷兼百老匯電單車會嘅會員。「今次多得車會各路好友幫忙，先可順利組成一支結婚車隊，我自己一早亦已經Plan好會用電單車結婚，特登問朋友借呢架東風750做新娘車，一來佢個速度唔係快，二來Sidecar乘客可以唔使戴頭盔，咁就唔怕整散新娘個頭。」CK急急講完兩句，又一個箭步跑去幫手打點準備過五關斬六將接新娘。

出動9架GoldWing護航

拍攝當日，同攝影師二人晨咁早入到粉錦公路某茶座同CK會合。未去到，離遠已經見到一架架巨型Chopper（巡航車）泊晒喺度，原來全場共有九架本田GoldWing「兄弟車」，部部都有型有款，又紅絲帶又花球，架架都經過悉心打扮。接完新娘，伴郎用佢架二十周年特別版GoldWing帶頭，跟其餘八架，前前後後將新娘車重重包圍，再一路慢慢由粉錦公路直駛去烏絞騰影番輯結婚相。沿途泊攝，不停被一對對眼睛包圍，有人駐足指指點點，有人索性攞埋部相機出嚟影埋一份，梗係啦，架東風750外形咁煞食，加埋新郎新娘一身襯到絕嘅中式裙褂、唐裝打扮，再加埋九架係威係勢嘅Chopper護駕，重有其他大大小小綿羊跟尾，呢個陣容簡直好似拍戲一樣，我都望啦！

■一對新人沿途惹來不少途人的目光，難怪新娘子開心得舉起V字勝利手勢回應。

國產花車逐part睇

1.乘客位特別鋪上軟綿綿羊毛墊，等新娘可以坐得舒服。

2.花車布置全由CK自己包辦。

3.油缸上面個剪紙都係自己搞掂。

4.司機位後面重有一個位，咁即係一共可以坐三個人！

5.咪表、匙位集中在頭燈上面，國產設計果然與別不同。

開路先鋒限量版GoldWing

欣賞完新娘車，正在四圍昅之際，俾我見到負責開路嘅伴郎阿浩架車，望落同其他有啲唔同喎，原來佢嗰架係20周年紀念版，「雖然係特別版，但係佢個性能、配件同普通版一樣，我鍾意日本車零件襟用，買番嚟又唔使點樣大改已經好靚！」雖然係咁，但阿浩自己都稍微改咗少少，唔怪之得架車望落同其他有少少唔同啦！

■阿浩話佢就係鍾意GoldWing夠大架，揸起嚟無咁飄。

■電鍍部份同高置腳踏全是阿浩自己加裝，實用又好睇。

■整咗呢個保護罩，部i-pod就可以穩穩陣陣咁駁落部Hi-Fi度慢慢聽。

■尾箱下面有兩隻「耳環」，原來係用嚟鈎頭盔㗎。

Suzuki雙雄愈玩愈大

阿Roy同不死鳥一樣鍾意揸大羊，而且大家同樣由細車玩起，馬力愈玩愈大，直至近年愛上綿羊中最大馬力的SuzukiBurgman650，問二人呢部車有咩咁吸引，二人不約異同咁話：「呢架揸得舒服、夠大又夠快，唔使改裝都已經夠晒！」

■阿Roy（左）話鍾意「大羊」速度好又穩定，而不死鳥（右）就最愛架車夠大夠舒適。

■頭燈換咗HIAD燈，光啲又較慳電。

■儲物箱大到可以裝咗頭盔再裝埋其他雜物。

■「自動羊」極少有嘅加減波，可以令起步更爽快。

街車樣跑車餡HONDAX11

睇完羊，俾我見到架勁搶眼嘅黃色戰車HONDAX11，車主李生原來已經玩車三十年，咩類型嘅電單車都玩過。現時除呢部外，重有一部Yamaha綿羊仔，但既然帶得呢部出嚟見人，我好肯定呢部先係佢嘅「大婆」。「呢部車已經停產，佢個特點係外表似街車，但內裏就充滿跑車細胞。買咗返嚟我都無乜點改過，因為佢係用緊一副鬥車嘅Racing偈，平時夠用有餘，要玩速度佢又有，我耐唔耐就會想帶佢去劈個靚彎！」李生說。

■HONDAX11馬力超過百二匹，難怪李生話佢充滿跑車細胞。

■李生話落場胎要keep住攞去掟吓彎，咁先可以保持番個shape，入彎先會夠貼地。

■過萬蚊一條死氣喉，可以令馬力表現更好、速度更快。