今年係香港女童軍成立九十周年，前晚女童軍響總部舉行新春團拜，特首太太曾鮑笑薇、唐英年媽咪唐尤淑圻、何超瓊、梁王培芳等都有捧場，雖然已經係年十三，但係一班女士都好少理，個個着到紅噹噹，仍然非常賀年feel。年年都有到嘅賭王何鴻燊就來去匆匆，趕返澳門，八方問佢會唔會支持曾蔭權連任？賭王即時話：「梗係支持啦，咁好嘅特首，響佢領導之下，香港一直都咁好，支持！」咁擦鞋，唔知同特首夫人企響附近有無關係呢？而賭王乖女何超瓊講到中西情人節，就自報話無男友陪，只有商務晚宴同屋企人等住佢，何超瓊笑住話：「要搵（男友）都趕唔切啦，得番幾日，咁大個人，元宵陪吓家人都有意思。情人節，我從來無收過男仔送鑽石，有人送就半卡都開心啦！」
爆料熱線：29290000、27860099
報料傳真：26239278
報料電郵：[email protected]