去年無綫播出胡杏兒與黃宗澤主演的劇集《我的野蠻奶奶》，該劇故事出色、收視高企、演員也做得好，但兩人熱烘烘的緋聞比起劇集還要精采。
今次，杏兒剖白與黃宗澤之間的關係，對於發展空間，她是有保留的，「現階段係好朋友，佢係一個可以傾到心事嘅人，但我唔係咁容易鍾意一個人，我諗我太多要求，我會想有一個識得幫我諗嘅人，大家溝通到，又要佢唔花心，對我屋企人好，同我興趣一致，開心、夾嘅，要有上進心、有愛心，補到我嘅不足，因為我太情緒化。」
SMS傳情
拍劇的日子令杏兒和宗澤朝夕相對，俊男美女擦出火花本不稀奇，杏兒卻說她沒有，「林峯、吳卓羲都靚仔㗎，成日面對咁多有吸引力嘅人，又要個個鍾意，自己好hurt㗎，我都係想攞女主角獎先，我好多心願都未做到。」
杏兒揚言不察覺黃宗澤有追求之意，說他追她，她的反應是「黐線」，「大家同事咋！講真，作為一個朋友，佢咁耐以嚟喺工作上好勤力，俾緋聞呢啲嘢掩蓋晒，好慘、好被動，同你攞個飯盒，又話媾你，眼神有接觸，又話電大家，有時呢啲又避免唔到，會影響大家形象，人哋要講都冇法，好無奈，唔寫得太過份都由佢啦。」
有傳黃宗澤曾以六百個手機短訊追杏兒，她卻說：「佢係有SMS我，但唔係咁多、唔係咁變態囉。唏！舊聞啦，我唔係冇其他嘢吸引人呀？我唔係唔想講，係唔想掩蓋咗我做嘢，出親活動都係問緋聞，人哋畀錢請你嚟只係出緋聞，咁對大家都唔好，講緋聞，我拍劇幾乎個個都傳過。」
重點是她與黃宗澤的緋聞傳得最長、最盛，「可能套劇hit，我唔介意同佢做螢幕情侶，我同佢喺工作方面係好夾，只係唔想講太多。」但會否弄假成真？「唔可以話完全冇可能，點知㗎啫？唔可以講到咁絕對，總之呢一刻同佢冇，公司畀咁多機會我，未係做得好好又走去拍拖，會愧對公司。」
拍拖分心
說到底，年紀輕輕的杏兒在事業拚命衝刺之餘，相信也會想有男友錫錫的時候，魚與熊掌的選擇，會不會令她躊躇在人生交叉點上？「都要搵一個適合至拍到拖㗎，唔係為搵一個肩膊就求其執件，起碼攞埋個最佳女主角獎至諗，拍拖多少會分心，唔可以得一想二，啱啱至企穩一線，有機會唱歌，慢慢打入內地市場，太多好嘢喺前面，就咁走去拍拖會好唔珍惜機會囉。」
後記：成熟催化劑
一年前，是非纏身的胡杏兒接受本報專訪，句句說話開口夾着脷，她人太直，說話更直，最易發生言者無心、聽者有意的誤會。坐在旁邊的經理人聽到標冷汗，努力為她左兜右兜；今次再接受訪問，杏兒打開中門任你問，雖然答不答是另一回事，但毋須旁人解畫，明顯地，她長大了、成熟了。也許是非和緋聞，正是令藝人學懂人情世故的強力催化劑吧！