上周一，金管局總裁任志剛喺立法會話息口見頂之說只係市場一廂情願。佢咁講，最唔happy嘅梗係一班地產商啦，所以第二日，身兼地產建設商會主席嘅賭王何鴻燊就開出盤口，要同任總賭一鋪，仲話幾大都受，買一萬賠兩萬。
任總一向都唔係「省油的燈」，對於賭王下嘅戰書，任總噚日就喺談笑間接招。佢話自己對賭呢樣嘢都幾小心吓，明知輸嘅，加上仲有人肯一賠二，邊有咁大隻蛤蚧隨街跳，所以小心為上。任總曾經講過「聲色犬馬、嫖賭飲吹」有一半係佢嘅喜好，包括聲、馬、賭同飲。不過，對住賭王，佢居然話自己唔慣賭，仲質疑：「有句話十賭九騙，會唔會有啲乜嘢隱藏？」
上半年息口難回落
唔好以為任總咁講係俾賭王「拋窒」，佢話近幾個月市場一面倒話息口見頂，作為香港嘅「央行」行長，喺大家㷫烚烚時，有責任俾啲唔同意見。任總話，所謂見頂，息口一日唔回落，又點見到個頂喺邊呢，但上半年要見到息口回落，可能性非常之低。
任總噚日仲送咗過智慧錦囊畀一眾投資者，佢話今年市場有唔同力量向唔同方向拉，就好似一條拉到好「行」嘅橡筋，一旦有事發生，力量就會傾向一邊，即係話個市會好波動，尤其用槓桿方法投資嘅人士，就要小心當中嘅風險喇！
爆料熱線：29290000、27860099
報料傳真：26239278
報料電郵：[email protected]