胡杏兒由當初出道的一嚿飯、被導演勁踩是四線演員難竄紅，至現在躍居成無綫花旦之一，其死硬派性格唔聲唔聲奮力跑出，確令很多人跌碎眼鏡。滿有自信的胡杏兒直認對事業有野心兼恨奪女主角大獎，故她儘管與緋聞男友黃宗澤啱key，但魚與熊掌，還是首選攞獎第一。
事業篇：導演批死難竄紅
港姐出身的胡杏兒入行六年，短短幾年間已躋身無綫當家花旦之列，比起同期發展的楊怡、楊思琦和向海嵐等明顯跑快了，日前杏兒在尖沙嘴接受訪問，對於這個問題，她的答案是挺有自信的。
杏兒說：「自己有分析過，我唔係經常喺spotlight底下、唔係成日喺人哋留意嘅範圍之內，有時就係咁唔聲唔聲，已經去到好遠。我記得有年玩港姐版《一筆OUT消》，啲人唔覺唔覺，冇乜留意，點知最後我贏咗，少說話多做事，反而唔係咁多人注意重好啲，所以其他人都冇out我。」（註：○一年港姐版《一筆OUT消》有八位港姐參賽，首輪賽事向海嵐與楊思琦表現出眾，但一臉稚氣的胡杏兒最後竟成大贏家。）
硬頸有鬥心
幾年前的杏兒臉圓圓、儍更更，似足劇集扮細妹的角色人選，那時候她有沒有被人看輕？「經常！但開始好好就唔會有今時今日，我覺得自己係一個幾有鬥心嘅人，硬頸。人哋覺得你邊度掂㗎？吓，你覺得我唔掂？我掂畀你睇！」
五年前，杏兒演《絕世好爸》一劇時曾被導演睇死，如今仍歷歷在目，「嗰時拍呢套劇，有個導演同我講『數嚟數去，你都喺四線度！』套劇有陳慧珊、郭羨妮、我同劉錦玲，導演同我講『其實好似你哋咁，如果一出嚟唔爆，都冇乜機會，一定好難紅！』呢句話對我嚟講幾hurt，一來自己新，人哋咁講一定有佢嘅道理，佢比我入行耐，我諗會唔會好易成為佢口中唔掂嘅例子呢？我曾經為佢講嘅呢番說話唔開心，Paul哥（秦沛）喺《絕世好爸》入面係我哋老竇，佢有勸我唔好為呢啲嘢唔開心，最緊要做好自己，對自己有信心。
「呢行講靚女大有人在，講身材又未輪到我，自己就要比人再努力啲，Paul哥話你可以令佢（導演）跌眼鏡，我都令過好多人跌眼鏡，可能冇諗過我會有咁嘅一日。其實我對過去一年嘅成績好滿意，雖然舊年TVB冇獎，但都贏到好多認同。」
那杏兒是否對女主角獎項有野心？她坦言：「有，呢個係我其中一樣，唱歌都係其中之一，唔好淨係睇拍劇。」言語間，她真的表露自信，「以前我冇自信心，𠵱家愈嚟愈有，有時有啲嘢真係要信自己，你太過搖擺不定，人哋會覺得你唔知想點。」
俾阿姐點醒
TVB女角獎是杏兒的人生目標，但這個獎競爭很大，「我諗每個女藝員都想攞呢個獎，包括我在內，都好恨，其實呢個獎係一個認同，有良性競爭係好事，但相士批我三十歲先攞獎呀，𠵱家自己要累積多啲經驗，覺得自己做戲重有地方要進步。」
杏兒視演藝工作為畢生事業，揚言希望有朝一日，能與汪明荃（Lisa姐）看齊，「以前《婚前昏後》都同Lisa姐合作過一次，嗰時我係一嚿飯，都有俾佢點醒，唔係鬧，好似有次個鏡頭係見到我嘅，Lisa姐話『你企埋啲啦，見到你個樣至靚㗎』，我話『咁我應該做乜呀？』真係低B到呢……好蠢呀！Lisa姐就話『你做番你個角色囉！』其實佢係袋錢落我袋。同Lisa姐拍《識法代言人》時，佢曾經同我講，話我會令佢諗起佢後生時咁捱得，我幾開心佢會咁樣同我講，我都諗住畢生演戲，希望第時有Lisa姐咁嘅成績。」
撰文：朱倬誼
攝影：葉君海
服裝：Bauhaus
場地：HABITUTHEPIER@OceanTerminal
