鍾楚紅近年來對推動環保不遺餘力，她認為樹對城市好重要，大家切勿隨便砍伐樹木，紅姑又批評政府不夠重視環保，只注重城市發展。但她讚揚中小學生對環保認知強。
鍾楚紅昨日應愛信望慈善基金邀請，出席該基金在旺角拔萃男書院舉辦的「陽光計劃：樹與城市」活動，聽取中、小學生組成的九隊出線隊伍上台演講，參賽隊伍要以獨特的觸覺和心思，探討關懷社區及保護大自然生態問題，紅姑與其他嘉賓包括周梁淑怡、黃英琦、胡恩威及詹志勇教授一起任評判和頒獎嘉賓。
學生環保意識高
紅姑自息影後，致力推動環保，昨日她聽學生對環保的認知大感意外說：「真係冇諗過𠵱家啲學生對環保咁了解，近年我咁積極叫大家環保，因為政府一味注意城市發展，都冇好積極保護大自然生態，其實樹木對城市好重要，我平時一得閒就會去郊野公園行，咁樣對健康都有好處，𠵱家嘅城市人太忙啦！真係冇乜時間保育，樹木又生得差，我見到都好心痛。」
對於林青霞有意復出拍戲，記者問紅姑會否靜極思動？她笑說：「我都幾十歲啦！重拍乜嘢，我承認自己係重有戲癮，但問題要遇到好劇本唔容易。」
否認投資度假屋
問到紅姑是否與丈夫朱家鼎在泰國和峇里島建度假屋？她表示：「我都唔知點解啲報道會咁寫，根本冇呢啲咁嘅事，我同老公係好鍾意去旅行，但冇諗過起度假屋。」
採訪：馬健華 攝影：仇志德
