到會所食晚飯，碰到英語教師Ｍ，唔見好耐，問佢教書係唔係好激氣，佢話早已辭職唔做，改行做補習，收入重好過做老師出份糧，因為太多學生要補習英文，佢應接不暇，雖然係冇收入保障，但時間表自己訂，冇校長指揮，冇教改要煩，成個人輕鬆晒。左丁山話：「好唔掂啫，如果啲叻嘅英語教師學似你咁，唔教中學，專做補習，學校點搞？」教師Ｍ話：「我邊度識得點搞，唔該你問啲校長！」大家與不同朋友食飯，不便多談，拜拜前問佢有乜好介紹，令細路學好英文，佢話可以買一套BlackCat（小六至中三）英語叢書，以故事形式，誘導學童學習英語。此叢書由商務印書館出版，十分受歡迎喎。
第二日有咁啱得咁蹺，遇到校長Ｗ，講起英語教學，佢都皺眉頭，因為優秀英語教師容易流失，良禽擇木而棲，冇得好講。一啲直資學校嘅英語老師時時換人，令家長失去信心，令學校收新生有麻煩。咁講法，是否中學學生英語水準會下降呢？校長Ｗ話：「此又未必。依我近二十年觀察，學生因為要考會考，考高考，就算老師換人，佢哋為咗考好成績入大學，讀英文好有心機，死刨，考完高考，係中學生英語水平達到高峯之時，入咗大學，冇英文科，三年內疏於學習英語，專注本科，哈，到大學畢業時，英文水準差咗㖭，本地大學教育對大學生嘅英文，無增值可言。」
校長Ｗ似乎言之有理，如果大學生在校三年唔多理會英文（因為淨係主修科都讀餐死），確會發生英文跌Watt嘅情況。
校長Ｗ有位師弟亦係中學校長，係中文專科，去年居然唔做校長，提前退休，改做中文補習先生。照理做校長每月薪水近乎八萬元，自願放棄，可惜啲噃，想來亦係唔想理會行政之故。