女人，有時都幾變態，一時化身天生購物狂，一時又懶好動上山周圍貢，摸唔清佢個底唔慌會泊你碼頭。所以，男人一定要識投其所好，次次屈喺大型商場入面睇戲食飯一條龍遲早俾人叮走啦！趁得閒一齊踩入東涌，預先背定旅遊指南懶醒扮導遊，帶佢捐窿捐罅，食埋呢期勁Hit，麥嘜都掛喺口唇邊嘅齋鹵味，冧到痹呀！
記者：盧家蕙 攝影：何家亮
Model：Carrie、Steve、DracofromSalvador
羅漢寺齋菜無色素
於東涌新市鎮大嶼山巴士總站搭34號巴士，石門甲總站下車，步行約五分鐘便到達「羅漢寺」。羅漢寺前身是山洞，名為「羅漢巖」，由佛教信徒於1974年建成，以為身處荒山野嶺注定要吸風飲露？放心，這裏有飯堂供應「羅漢寺素食」。小記冒昧問住持有沒有橙色、黃色等麵筋及齋鹵味供應，住持笑說：「呢度嘅食物全部都係天然，唔加色素、味精，所以無坊間嘅染色食物，大家可以放心食用。重有呀，呢度連餐牌都無，因為我哋會為善信選擇最好嘅，阿彌～陀佛！」既然染色齋鹵味唔健康，今日一於同麥兜一家齊齊戒色，齋食齋。
a.豆腐、豆漿都是這裏的招牌佳品，鋪上粒粒黃金粟米及雜菜的山水豆腐，豆味非常濃郁，滑嘟嘟得入口即跣落喉嚨。
b.香椿葉常用於素食中，那份獨特的香氣可取代蒜及葱的香味，混雜於茄子中，味道更天然新鮮，適合戒吃蒜及葱的素食者。
c.由腐皮製成的素鴨，全屬自家醃製，講到尾都是油泡食物，香口鬆脆是必然的，難得沒有一咬開就成啖油情況出現，忍唔住又食多幾件。
羅漢寺素食（29881419）
收費：成人$60，小童$40（2-3人：3菜1湯；4-5人：4菜1湯，餘此類推）
供應時間：12:00nn-3:00pm
地址：大嶼山東涌石門甲村羅漢巖
入廟拜神息凡心
滿足過口腹之慾後，係時候平息吓凡心，入廟拜神！沿羅漢寺拾級而上，到達高三丈六尺的大雄寶殿，這裏佔地寬闊，金碧輝煌，遠在對面的青山山腰、屯門都望得見。殿內供奉了金身佛像，釋迦、彌陀、藥師三如來端坐大殿中央，不少善信一見即意境開朗，身心清涼，頓息凡心而生恭敬心咁話喎！
必睇動盪炮台
沿東涌循回頭路走，大約40分鐘路程便到下嶺皮村，步行10分鐘，越過石牌坊，便到達東涌炮台的城樓古堡。炮台於1979年列為古迹，是香港唯一保留炮台的堡壘。曾是清代重要的海防據點，到了抗戰時期，幾座大炮曾用作抵抗日軍，二次大戰期間，炮台更一度為日軍佔據，後來又用作警署，可說見證着香港的動盪歲月。
學機師食泰菜
係時候覺得喉嚨乾又腳仔軟，由石牌坊走回路行10分鐘左右，便到達下嶺皮村的「美樂軒泰菜館」，裝修雖然一般，但食物水準不俗，價錢更比市區便宜2-3成，最搞笑係附設「機場及區內免費專車接送服務」，原來平日不少機師和機場服務人員會前來幫襯！
1.Model邊食邊滴汗大嗌：「幾辣，不過辣得嚟好惹味，好正！」乾身紅咖喱加入了秘製醬料，格外香辣味美，不愧為招牌醒胃菜。
2.澆上香甜紅咖喱汁的開邊越南大頭蝦，再鋪上炸開的鬆化蛋絲，惹味多肉的大頭蝦，小記食到成手油。
3.至愛軟殼蟹連肉帶殼唔使吐骨，食得瀟灑利落，件件鬆脆香口，椒鹽味滲透蟹身，佐酒佳品。
美樂軒泰菜館（29888129）
地址：東涌下嶺皮村10號地下
營業時間：10:30am-2:30am、5:30pm-11:00pm
