老人家嘅智慧一節淡三墟真係冇講錯，年假後好多舖頭都大歎冇生意；消費者個荷包固然要唞唞氣！冇乜新貨、筍貨衝擊更係問題癥結，今個星期3區DVD照樣冇大片落場，星期五晚返咗隻《情癲大聖》叫做稍為撐得吓；劉鎮偉出品再加英皇一眾青春偶像，點都有一定號召力嘅！
記者、攝影：朱崇德
一攞隻《情癲大聖》上手，因乜解究有成3個版本咁多？普通版（$83）、天碟版（$89）又「手抽袋」限量版（$104）。追問得知3個版本都係行孖碟，影片內容亦一模一樣，普通版一碟電影、一碟Bonus；天碟版就大玩dts96/24靚聲，不過就齋玩粵語配音（普通版有國語配音）；至於限量版就內附一隻「天碟版DVD」，再加一套12款雷射卡紙月曆企架，及可套相片式MousePad連3R劇照。邊個版本抵買真係見仁見智，套句現場碟友評語：「啲禮品唔多實際，有環保意識嘅就買天碟版；買前重要留意屋企部機係咪對應dts96/24，否則普通版得喇！」。
科幻化勁Sell特技
劉鎮偉出品、又係《西遊記》，好多人馬上聯想起星爺套《月光寶盒》同《仙履奇緣》，但佢講明早在10年前已有《情》的腹稿；故事屬前傳性質，三藏「檸檬」好搞笑地是「家英哥」前世，帶住三個徒弟抵達西域取經，奈何被樹妖奇襲下，一眾徒弟不敵成階下囚，檸檬本想到天庭班救兵，誤打誤撞下竟同醜女阿Sa同行，因誤殺天兵變逃犯，最後為救徒兒性命，檸檬求助於外星公主，出動有如《星戰》的機械戰團惡戰樹妖！真係相當天馬行空，完全翻轉了傳統《西遊記》！故事好壞實難評定，呢種玩轉時空概念相當大膽，反而可能是接受與否嘅問題。
醜女配靚景超殺
最搶鏡都算係阿Sa個醜女造型，食正當時李笑好嘅醜女熱潮，加埋有如童話的村莊及夢境般的森林，美得令人屏息，一醜一美相當有衝擊！服飾設計出自行內一流嘅張叔平之手，襯色及造型令每個傳統角色富予新生命。唯一敗筆是CG實在太爛，欠缺真實感，「如果要為這段CG加上一個評語」，覺得只屬港產電腦遊戲嘅水平。
《孫燕姿演唱會》DVD畫質差？
呢期演唱會DVD出個唔停！個個星期都有3幾隻排隊落場，不過論話題性，都可算係《飛躍紅館孫燕姿2005香港演唱會》；好多碟迷投訴話畫質差似VCD！老實講，影碟解析度其實已達720×576，絕對是DVD水平；不過有啲碟迷較吹毛求疵，感覺畫面邊位鋸齒紋情況較嚴重，而且色彩層次亦微感不足，所以令人錯覺畫質有問題。據知《飛》呢排在場內屬熱賣演唱會DVD，除整整收錄了演唱會內28首歌外，還收錄了孫燕姿自選最愛的15首MV！孫嘅唱功好！相信好多人都知，碟內必睇者，是《SilentAllTheseTears》，唱Live難度極高，即場演繹亦感出色，感覺有原作8、9成神髓。
