湯臣（258）05年頭以嚟，一直喺2.4元至1.82元大兜底，破到2.45元阻力，會飛。湯臣最新NAV3.15元，現價（2.35元）相對折讓25%，睇嚟一般貨仔，但呢家主打上海浦東房地產企業，發展中物業連土儲約600萬平方呎，包括黃浦江邊無敵樓王「湯臣一品」（152.7萬平方呎）。參考湯臣去年6月底，土地租賃及發展中物業總值16.5億銀，粗略計數，每方呎均價只係275蚊。
呢期進駐浦東港資大孖沙，地價成本每方呎上千蚊，對比之下，湯臣增值潛力好有爆炸性。湯臣土儲每方呎增值/獲利，睇齊大孖沙地價成本，額外增值60億銀，代表每股增值5.1元，NAV翻半番以上去到8.2元，折讓係講緊71%。
湯臣升到上重估後NAV50%折讓水位，股價4.125元，潛在升幅75%。又呢期資金流向落後祖國地產股，天安（028）上星期五向上爆，湯臣係大墜後黑馬，買嚟等爆。
華大突破前夕
華大地產（201）最近兩個月喺50日線至250日線之間橫行，突破前夕，多望兩眼，又講兩點：第一，華大NAV約0.22元，現價（0.141元）相對折讓36%，計埋集團喺沙士期，以2.3億銀撈底買入英皇道地皮，家陣NAV增值見0.345元，實際折讓近60%，折讓重係吸引。第二，呢期多隻二三線地產股仔，亦係橫行待破格，而地產股指數對上星期五喺50日線止跌，有勢反彈，重磅地產股有運行，二三線同類有機會尾隨。華大破到250日線（0.148元），下個技術位睇0.165元，現價潛在升幅17%。
錢雋