結婚係由無數的抉擇組成，用數年時間去選擇一個啱嘅對象，用起碼3、4個月時間，去輪候一個稱心嘅行禮好日子，人物、時間可以慢慢唔啱揀到啱，但地點偏偏無乜得好揀，來來去去都係教堂或者婚姻註冊處，好多憧憬都因無選擇而落空。失望？咁又唔使，香港已有法例通過，遲啲可以喺任何地方證婚，將會訓練一批律師去做證婚人。𠵱家就幫你諗定夢想嘅婚禮，再睇吓各界有乜心水，日後慢慢付諸實行。
記者︰劉昱蘭 攝影︰何家亮
Model︰Wysam、Johnny（Salvodor）、Annabelle
鳴謝：芝栢婚禮殿堂、月姥結婚用品店（35862611）
最慳錢：熱鬧街頭vs寧靜灘頭
鄧穎芝︰「我鍾意浪漫沙灘多啲。我成日都見到好多觀眾fans，結婚唔使咁熱鬧喇。青馬大橋下又靚又有香港特色，而且我又好鍾意水上活動，第日可以唔着婚紗，主人家同賓客一齊着泳裝bikini行禮，夠晒別開生面。」
明星梗係唔想咁熱鬧喇，但我哋呢啲凡人就無幾可。結婚係一生一次，揀24小時都咁多人嘅旺角，下午4點後嘅行人專用區行禮就最旺場，街頭百人圍觀，難得忙個不亦樂乎。
如果鍾意低調靜靜哋，去沙灘就一定最啱。只約幾個親朋好友，加上天地山水為證，細說一聲「我願意」，浪漫醉人。
後生至好試：刺激空中滑翔vs水底暢游
李彩華︰「雖然我鍾意刺激，但我好怕水中活動會有意外，欺山莫欺水，而且滑翔傘有教練跟住，所以空中結婚會刺激、過癮、難忘又放心。」
要玩滑翔傘空中婚禮，香港就剩係得一位合資格嘅教練文錦輝先生幫到大家。佢可以載新娘從天而降，降落到新郎身邊，教練任務完成，跟住就係新娘新郎雙雙行到證婚人前宣誓，好緊張喎。
文教練雙人飛行收費︰$750/45分鐘
聯絡電話︰96200577
至於水底潛水婚禮，夠晒刺激浪漫兼獨特，喺海洋公園世界級嘅海洋館，𠵱家有得搞喇。珊瑚魚圍住你團團轉，呢種氣氛要有潛水證書嘅新人先享受得到喇。
水中良緣婚禮收費︰$109,999（包婚禮及陽明山莊怡景廳十席中式婚宴籌備、兩晚豪華套房住宿、司儀、攝影及60張海洋公園入場券、威威獅令到賀等服務）
銷售熱線︰28738560
西式婚禮騎馬vs庭園
譚小環︰「童年時已經會幻想，有個白馬王子同自己成日騎住馬，生活快樂無憂，咁現實可以實現到嘅話，梗係揀騎馬婚禮喇。」
我幻想嘅就梗係《風月俏佳人》尾段嘅婚禮場面咁浪漫喇，但要向現實低頭，冇咁高要求，香港專業馬術學院場地都幾合適，有草地、沙圈和燒烤場，可以配合婚禮和party，重有專業教練睇住，包冇問題。但學院仍未定包場婚禮嘅細節，要等法例實行先決定。
香港專業馬術學院（81143092）
地址：新界石崗錦田路DD111號3040地段
西式花園嘅婚禮，最緊要係草地同圓拱形花門，加埋個露天party，氣氛熱鬧輕鬆。影灣園係最合適嘅場地，有靚草地不特止，重有無敵海景，環景一流。
地址︰淺水灣道109號
電話︰22922829
網址：www.therepulsebay.com
婚禮收費︰$550/人
最過癮：香港好景山頂vs寶蓮寺
陳敏之︰「我不嬲都鍾情山頂，如果可以着婚紗搭纜車上山再證婚，咁就perfect喇。」
山頂景色世界知名，有天上月亮、地下萬家燈火為你倆見證，景致完美迷人。想神聖莊嚴啲除咗教堂重有邊個地方？信佛嘅可以喺天壇大佛做見證。着西式婚紗上天壇證婚，場面新鮮夠破格。
上寶蓮寺及天壇大佛證婚，需要書面申請。傳真︰29855245
重點好日
除咗好地點，都重要夾個好日先得。就等堪輿大師楊天命先生，為大家查查通勝，擇個吉日良時，06年重有12個好日趕及排期，但小心好日原來唔係人人都啱，會有生肖相沖㗎。
