示愛其實好簡單，若然係互有意思，講一句已經明白晒，第二句可以拖手，講埋第三句隨時返埋屋企見世伯伯母。但女人鍾意威，明明小事一樁，總要發大嚟搞先開心。平平哋搞大件事，可以拉Banner、變魔術、甚或搵街頭歌手唱Live情歌，全部五百蚊樓下搞掂。趁情人節出手，最緊要唔怕醜，女嘅受得開心，男嘅拖得穩陣，夠晒威水啦！
記者：馬慶武 攝影：傑、陳陶鈞
Model：Johnny、Bianca
街頭伏擊意中人
試諗吓，喺旺角行人專用區行行吓，在一排上網、學車、健身等街頭推銷攤位中，突然睇到一個表白「易拉架」，重發現主角係自己，之後再有一個推銷員彈出推銷自己發表示愛宣言，嘩！幾老套呀！係！局外人多數會覺得老套，就算主角會覺得老套難堪，但都會係事後嘅事。嗰一刻，除非好憎對方，否則點都係開心嘅！
趁重有幾日至到情人節，只要將相片及求愛語句畀「忘憂良品」呢間公司，就會有專人幫你趕製示愛易拉架兼當日送到指定地點，到時扮唔覺意行過見到又得，自己扮推銷員專程埋伏目標亦得，得咗！
忘憂良品（60222049）
價錢：$499
網址：www.chemtoy.com（網頁上有示愛實況，去馬之前要睇睇！）
收費：★★★☆☆
難度：★★★★（面皮要夠厚！）
Harry哥哥教路魔術示愛！
情人節自學一招半式魔術示愛有型又浪漫，被拒絕重可以講句：「玩吓啫！個魔術過癮呀呵！」，咁都好下台吖。今日Harry哥哥醒你兩招，變法程度夠晒簡單，就地取材零成本！
紙巾變玫瑰
收費：★☆☆☆☆（可以話免費！）
難度：★☆☆☆☆（一學就識！）
卡片變情人卡
收費：★☆☆☆☆（卡片都係唔使錢啦！）
難度：★★☆☆☆（都係無難度可言！）
旺角街頭情歌Show
幾千蚊搵樂隊現場演奏？衰咗蝕到入骨肉都赤，平平哋其實可以搵街頭演唱嘅叔叔幫手。旺角行人專用區隨時都有人表演，行人隧道重長駐樂手玩音樂，記者問過，佢哋個個都好Nice，話只要識彈，情人節幫手絕無問題。隧道內咁多個檔口，每個檔口預先畀定表演費，MK版「弦途有你」即時上演。不過只限懷舊金曲，新歌免問！記得尊重長者噃，人哋好心幫你。而且有愛心好受女仔歡迎㗎！
收費：★★★☆☆（打賞梗係要，無固定收費）
難度：★★★☆☆☆（唔係自己落場，邊有難度可言！）
將你我化身小說主角
香港大膽少女多的是，內向怕醜女亦唔少，唔想嚇怕人，又怕當面被拒絕嘅，可以揀呢個方法──寫愛情小說，將自己及對象變成小說中主角，浪漫得交關，撞啱對象係小說迷，成功率都高啲！工作咁忙時間咁少，當然唔會叫你自己落手寫，只要將自己同對象嘅基本資料及喜好E-mail畀小說公司，最快兩日就可以寫好一本5萬字小說，重幫你包到靚靚送到對象手中，含蓄得嚟極有心思！
Sweetsweet.net
www.sweetsweet.net（29614833）
價錢：$289/本
收費：★★☆☆☆（$289兩日起貨，重送埋貨，平！）
難度：★★☆☆☆（畀錢搞掂，真係易咗啲，文筆好不妨自己寫！）
歌手示愛有諗頭
