東亞（023）晏晝開市前派成績表，市場叫好，去到尾似模似樣，打鐘時大摩24.80元掛買盤，掛遲咗，電腦判收24.70元，升0.40元。東亞升，為大市帶來好好嘅氣氛，恒指收市有12點進帳。
東亞C輪4805：東亞C輪4805，最熱門，有117球易手，收14仙，升13%。隻輪4月初夠鐘，負溢價1.2%，槓桿率17.6倍（有效12.5倍），引伸波幅22.6%。點解咁快負溢價？係因為正股3月9日除息0.93元。假設東亞除息實際冇升冇跌，隻輪實際溢價係2.7%，唔平。
但東亞盤數靚，股價睇升，所以隻輪仍然值得睇好，但要實際溢價縮啲先至考慮。
東亞另1隻C輪9046，9月尾到期，輪價17.5仙，溢價2.2%，槓桿率14.1倍（有效8.4倍），引伸波幅19.6%。
石油C輪：石油C輪有4隻，1隻啱啱停止買賣，兩隻冇成交，1隻（9911）成得13萬元。9911喺5月下旬夠鐘，但溢價11.3%，槓桿率9.4倍。咁嘅數據，你買埋我份。石油窩輪先天性不足，一般報價機冇打出溢價等數據。而輪價變動，睇油價，去邊度睇？隔晚紐約升跌，已成定局。睇「亞洲時段」油價？捧住個電視機抑或揸住個收音機？唔係主流嘅嘢，發行商最好無謂搞，慳番畀交易所同證監會嗰幾皮銀両。
石油P輪：石油P輪亦有4件，件件零交投。就算有成交，都係你買埋我份，溢價8%至14.9%，點買得過？
章盛