好多時睇一齣恐怖片,但求每10分鐘有一個驚嚇位,令觀眾們突然打個「冷震」,咁已經算不過不失!但係睇戲又唔同打機,恐怖Game除咗要具備必嚇位外,更不可或缺嘅就係氣氛!論到氣氛,還不及SCE近年經典《死魂曲》咁逼真!經過兩年時間,新作繼續大玩通靈搵屍人,睥到佢喺邊重可即刻閃人!
記者:陳國輝
攝影:陳偉強
ImageGirl:Joey
所謂「恐懼」,每個人睇法都唔同,但大體上總離唔開眼、耳兩種官能刺激。《屍人2》玩盡PS2機能,將人物面部動作,特別係驚慌、陰森等表情完全表現,連講嘢口形都夾晒,值得一讚;至於音效方面,強調「不協調的聲音」,例如屍人從遠處嘅呼吸聲、嚎叫聲等,力求仿做成另一個真實空間。遊戲會先推出日文版,繁體版另於3月9日推出,想玩中文不妨等吓先。
場景超黑玩到暈
雖然環境愈黑唔代表愈恐怖,不過喺《死魂曲2》所有劇情裏面,一樹守、永井賴人等主角都係靠一支手電筒由頭撐到落尾,「照」足全程!老實講,黑麻麻咁玩鬼Game實在好有Feel,隨時隨地,電筒照唔到嘅地方可能有屍人撲出嚟咬你㖭,夠晒驚嚇!之不過黑畫面配埋第一身視點操作,筆者玩咗一粒鐘便告頭暈!特別係用警察嗰陣,手上冇電筒四圍又黑麻麻,經常撞埋牆甚至畀屍人襲擊亦嚟唔切反抗,所以最好將部電視Tune光啲先玩!
搶架生反劈屍人
有時因劇情需要,主角必須彎低身行路,先可避過屍人嘅視線範圍,當你想慳時間,費事同佢慢慢「磨」嗰陣,呢招就最萬試萬靈!當然,大部份玩家都鍾意「清場」,若然連留低一件活口,心裏都放唔低嘅話,咁就要同班屍人死過!今集重可執起屍人用過嘅武器,例如鐵水管、燒烤叉、木棍或者斧頭等,一拎起就狂砍敵人,感覺不知幾爽!條件係當敵人被你擊倒,件武器就屬於你;不過,SCE喺設計呢隻遊戲時非常公平,你可以用敵人架生,原來對方亦可以用番你嘅嘢,唔似上集用嚟用去都係嗰件武器咁悶,多元化之餘又真實咗!
借狗通靈搵眼鏡
遊戲另一特色,就係可通過「視界截取」嚟解謎過關。簡單啲講,「視界截取」即係所謂嘅通靈,每位主角都具有呢種天賦特質,但能力值唔一樣;當用佢嗰陣,視點能夠穿越自己範圍,變成敵人嘅視點,就好似裝咗幾部閉路電視機一樣,要順利過關爆機,今集唔靠佢唔得!值得一提,第二集還加入兩種嶄新嘅通靈方法,第一種係能夠越過時空,睇番呢個地方以前發生過乜嘢事;而第二種,就係跟動物通靈,諗起都搞笑!記得玩到用三上脩嗰陣,因為佢搵唔番副眼鏡,視點極之模糊,於是乎佢就同身邊隻狗做通靈,利用狗嘅視點行動,咁玩都得,真係估佢唔到!
PROFILE
遊戲類型:AVG
對應機種:PS2
遊玩人數:1人
開發商:SCEI
行貨售價:$378
查詢:SONY服務熱線(23452966)
(C)SonyComputerEntertainmentInc.