過氣歌手癲王呢排好似冇乜聲氣，沉靜咗好耐，唔知喺邊度發財，大家估佢可能已經唔再癲，點知佢癲得重搞笑。
長褲暗袋摷到錢
馮仁昭聽啲夜場老友講，早排癲王單拖去澳門一間夜總會消遣，一到場就聲大大咁，一見人招呼佢就指住自己個鼻懶叻咁話：「我識你老細㗎！」但佢唔知對方就係嗰度老細，個老細都費事理佢，求其有客上門就算數，點知癲王叫咗小姐玩完一輪食飽咗後，竟然同人話冇錢畀，小姐梗係唔想白開工啦，即call幾個大漢嚟搞掂佢。
癲王重唔識死話自己真係冇錢畀，食覇王雞重大模廝樣，結果梗係俾人打鑊金啦，幾位大漢重搜埋佢身，點知就喺佢條長褲嘅腰位暗袋度摷到錢出嚟，梗係全部沒收啦。癲王食完嘢有錢唔畀，咁識計數，都唔知究竟佢真癲定假儍呢？