前日現代美容（919）掛牌首日破底，但昨日掛牌的精熙國際（2788）就氣勢如虹，最高見過3.875元，收市報3.60元，比起招股價2.20元，高出64％，成交亦一樣好誇張，高達1.74億股，金額5.92億元，
經紀黃話，近年數碼相機大行其道，作為零件生產商的精熙，一開始招股已經十分受歡迎，佢嘅客戶都係有名的日本牌子，所以投資者信心十足。
據講芬佬想要貨，但分得非常少，加上公開招股部份大超額，搞到配售部份要回撥過去，噚日一開市就有芬佬在市場搶貨，所以搞到隻股升得咁誇張。
另外，早前提過的小型大陸地產股中新集團（563），股價前日炒到1元，創下新高後，旋即在昨日下午停牌配股集資。江湖傳聞今次中新配股，係由近期最勇猛的德資行負責，每股配售價介乎0.87元至0.93元之間，集資額高達6億幾銀。
經紀陳話，中新由去年中起步炒到𠵱家，累積升幅成倍咁多，批股集資其實好正常。
慕容小初