將軍澳蔚藍灣畔發展商持有嘅最後一個頂樓連天台單位，啱啱以一千萬賣出，呎價逾七千二，創區內今年新高，亦係呢區歷來十大高價成交之一。
利嘉閣黃展望話，單位係三座頂層B室，近千四呎，內置樓梯直達面積過千呎嘅天台，成交呎價七千二百幾，相當理想，買家係換樓客，買入自住。
將軍澳係新市鎮，高樓大廈密麻麻，由公屋、村屋、居屋以至私人樓包羅萬有，淨計私樓，入場費百零萬有交易，以成千萬買個將軍澳單位，相信好多人都覺唔值。
同日，薄扶林老牌豪宅屋苑碧瑤灣二千三百呎巨宅，都係以呎價六千蚊賣出，低過蔚藍灣畔十幾個巴仙。
蔚藍呎價比起西半山知名豪宅嘉兆臺只係低少少，日前嘉兆臺一個高層千六呎單位，成交呎價七千七百幾。究竟係舊咗嘅豪宅唔值錢，定係新市區屋苑呎價唔正常偏高呢？真係見仁見智嘞。
蔚藍灣畔呢個千萬單位，都唔算區內最大碼嘅成交，屋苑另一個頂樓單位，舊年四月以一千一百五十八萬一手賣出，令市場嘩然，點知業主揸咗個幾月，以千三萬轉手，原來高處未算高，短時間可以再升多一成二，原業主勁賺超過百四萬。以當時市況，即使薄扶林或西半山豪宅，都未必有咁快同咁大嘅升幅。
電郵地址：[email protected]