張國榮走，我感受好深，但係令我最大感觸、覺得最可惜嘅，係黃家駒走（九三年），佢嘅意外，令人好震撼。我當時覺得唔係吖嘛？咁戲劇化，佢只係喺天花板咁高跌落嚟，得嗰十幾呎，講真跌十次都好難死得去啦，真係上帝要你瓜，你就一定瓜。
睇錢份上闖日本
最後一次見家駒，係喺佐敦倫敦廣場，佢知我鍾意食上海菜，約咗喺雪園，佢諗住去日本發展，Paco（黃柏高）當時係佢唱片公司老闆，但家駒都想聽吓我嘅意見，佢話「香港冇得做，香港嘅歌壇係垃圾」，佢覺得好辛苦好大壓力，日本嘅Amuse畀咗好大嚿錢佢，睇錢份上，佢諗住去日本闖一闖，佢問我應唔應該去，但同時又講咗好多道理支持自己去，我話既然係咁，你重問我做乜？
我接觸咁多歌星，最乖係Beyond，我第一次見佢哋印象好好，第一次聽《昔日舞曲》，嘩，好勁，呢隊乜嘢band嚟㗎！基本上Beyond當時好窮，好想搵錢，但同時對音樂有堅持，唔係隨便妥協。我做Beyond最開心，因為所有嘢我話乜，佢哋都會照住做，好滿足到我嘅創意，《真的見證》（八九年）隻碟就係我同佢哋做，之後開演唱會，佢哋唔夠歌，我話唱番寫畀人嘅歌囉，嗰陣唔興咁做，佢哋話會唔會唔好呀，但最後都聽我講，佢哋重唱麥潔雯原唱嘅《歲月無聲》，𠵱家全部人都以為係Beyond原唱。
滄海遺曲無價寶
當時Beyond四個之中，最得女歌迷歡心、同時最多女歌迷送上門嘅，係喺隊入面顯得最普通嘅葉世榮，鍾意家駒嘅女歌迷好多都唔靚，世榮啲女歌迷就好多都靚，嗰陣畢美娜（澳門小姐）同世榮有過一段羅曼史；家強係最內向嘅一個，同時亦最唔開心，因為榮耀盡歸哥哥，就算係佢唱紅咗隻歌，人哋都覺得係哥哥家駒寫畀佢嘅；阿Paul（黃貫中）不嬲覺得自己有料，但佢份人唔計較，冇所謂邊個得，成隊band得即係自己得；家駒係壓力最大嘅一個，因為一講「做乜嘢呀」，跟住嗰句就係「問家駒囉」。
家駒重有好多作品遺留喺以前嘅經理人度，有兩隻歌如果搵得番嘅話，一定好值錢，一隻係Beyond喺商台《龍鳳配》環節唱夏韶聲嘅《結他低泣時》，另外一隻係家駒唱電影《阿郎的故事》插曲《也許不易》，隻歌係李健達寫詞嘅，杜琪峰聽完，話好正，要喺新藝寶搵人唱，我叫家駒唱，佢唱得好好，不過話個key高，問可唔可以再做過隻歌，但因為時間太趕，最後搵番李健達唱，𠵱家啲demo都唔見晒。
口述：陳少寶
撰文：張止寒
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
