袁彩雲自與合和太子爺胡文新拍拖後，即時聲價十倍，前晚更獲名牌Prada贊助新裝到場睇騷，而正與恒基二少爺李家誠蜜運的徐子淇亦同獲贊助，兩位豪門準媳婦同場各自大晒幸福。
袁彩雲表示未計劃如何慶祝情人節，問她可會閃電結婚？她說：「唔會喇，我係鍾意wellplan嘅人，要慢慢計劃，雖然今年係好年，我又屬兔，運程幾好，不過都係工作行先。」
炮製心形蛋糕
袁彩雲又透露將親手炮製心形蛋糕給男友品嚐，她甜笑說：「好多節目叫我整，我都想試啱先整畀佢，我已經買定心形嘅蛋糕模，平時整心形好『娘』，情人節就冇所謂啦！」
徐子淇則表示事隔十多年重遊珍寶王國，令她想起小時候的外籍老師醉酒跌落魚池的笑料。提到男友李家誠與家人遊日本，徐子淇說：「人哋屋企去旅行都跟住，唔係咁好囉！」
問子淇可有準備情人節禮物？她說：「唔一定要買禮物，兩個人開心就夠啦！」徐子淇又透露會將四年大學生涯及留學心得編寫成書，成為大學日誌，希望幫到香港留學生。
