眨眼就1個月，8號仔小小超請人免費用Sunday3G呢個驚天地泣鬼神嘅壯舉，今日截止登記，正所謂執輸行頭慘過敗家，雖則華華認為嗰部U636確實係alittlebitleung（即係「娘」），但唔使錢，點計都無乜損失，所以華華都叫人去登記！
咁直到𠵱家總共有幾多人登記咗呢？佢哋鰂魚涌41樓嘅權力核心堅決唔肯透露，但華華八到應該數以十萬計，記住，一向重質嘅小小超係要揀150蚊月費以上啲貴客，若閣下只係每個月月費幾十皮嘅蛋散，則閣下可以當無睇過呢個呼籲。
不過話就話今日最後召集，但以二少咁精明嘅生意頭腦，又豈會輕易放大家走出佢手指罅呢！前日，Now就趁呢個推廣完結前，推咗個迷你套餐，用簽18個月約送6個月試玩3G嚟接力，其中一款Plan重可以用3400蚊買到近期潮爆、街價要4400蚊的「無得撈啦」V3X，大大話話平咗成千銀，又係點講都有着數，據聞條登記熱線又爆晒……
所以，華華成日覺得，小小超其實比曾特首更了解香港市民想要啲乜！
李華華