據說花旗集團內部出咗通告，加盟5年嘅亞太區主席番薯梁梁伯韜（圖）已辭職，做到今個月底就回復自由身，之不過話晒佢都係紅籌之父，花旗邀請佢留任高級顧問，協助維持與中港客戶的關係，佢哋亞太區企業同投行業務行政總裁RobertMorse話，呢個安排可令番薯喺公司外發掘個人興趣，同時喺花旗與主要中港客戶之間扮演積極角色喎。
華華收到風，51歲嘅番薯，自己開咗檔私伙，個名類似叫做渤海基金。由於投行家經過長年的「職業訓練」，對投資項目的好壞十分敏感，過往佢哋淡出投行界後，多數轉入上市公司做董事，幫公司搵項目，但近年則較多轉投私人投資公司，例如滙豐中國區投資銀行前主管宦國蒼就喺去年7月加入PrimusPacificPartners，中銀國際控股總裁李山去年10月離職，亦喺國內成立自己嘅私人投資公司。