中聯辦噚日搞新春酒會，曾班子齊齊捧場，政協副主席老董都有出席，坐上主禮台嘅煲呔同老董就貌合神離，除咗祝酒嗰刻，都無乜交流，唔通兩個人唔係合作夥伴，就即刻無偈傾？
近期有啲傳言話，港澳辦主任廖暉因為身體健康問題而退休，中聯辦副主任李剛就專登澄清，話廖主任工作同身體都非常好，年紀亦好輕，擔任國家領導人，年過六十都仲算係身強力壯，強調有關調任嘅傳言都無根據，如果信咗，就係無理智，講到好實牙實齒咁噃。
廖暉唔退住，對煲呔最有着數，事關佢仲有個強勁後台撐住，賭王噚日都話，知道中央仲好支持煲呔，睇怕都無錯啩。
雖然賭王對煲呔好滿意，但講起西九龍，繼續一肚氣，話地產建設商會一路都唔贊成單一招標，即使寡頭壟斷都唔得，有飯要大家齊齊食，唔知肥龍係咪時候又要搵搵賭王吹水安慰一吓對方呢？
政府呢頭講和諧，嗰頭喺酒會門外，有個女賓客行過示緊威嘅長毛身邊時，就無啦啦輕輕摑佢幾巴，不過長毛無還手，仲笑笑口話，唔好同佢計較，最講和諧嘅竟然係長毛，好奇怪。
傳真︰2623-9278
電郵︰[email protected]